Eusko Jaurlaritzaren Hezkuntza Sailak Azkoitian dagoen Bizilore Eskola Aktiboa homologatu du, eta horrenbestez, hainbat urtez libre izaera izan duen ikastetxea sistema arautuan txertatu da. Homologazioa esku artean, beraz, Bizilorek ikastetxe aitorpenarekin eta onarpenarekin lanean dihardu egun.

Gaur gaurkoz, 30 bat umek ikasten dute Bizilore Eskola Aktiboan, eta horietatik hamalauk 6 urte baino gehiago dituzte, hau da, hezkuntzaren derrigorrezko aldian daude.

Zaine Rekondo, Bizilore Eskolako Batzorde Pedagogikoko kidea

Zer da Bizilore Eskola Aktiboa?

Bizilore komunitatean eraikitako 2-12 urteko eskola aktiboa da, umearen ongizatea ziurtatu eta garapen osoa bultzatzea helburu duena. Bizi-prozesuekiko errespetuzko ikuspegian oinarrituta, ume bakoitzak bere erritmoan konkistak egiteko aukerak eta baldintzak sortzen dira, norbanakoaren izaeraren garapen askea eta harreman orekatuen zein osasuntsuen aldeko apustua egiten baitugu.

Eta hau guztia posible izateko testuinguru aberats eta prestatuak sortzen dira, errespetuzko garapena bultzatzen duten material, espazio, proposamen eta helduen jarreren bidez. Umeekin egunerokoan dauden helduak, hauen ongizatea, garapen osoan zein ikaskuntza prozesuan bidelagun kokatzen dira, umeen beharrak identifikatu eta egoki asetzeko esku hartuz.

Zer egiten duzue Eskolan?

Biziloren umeak garapen aldiaren arabera bi komunitateetan banatzen dira: Haziak eta Kimuak. Komunitate bakoitzak bere bizitza du eta denek batera familia handi bat osatzen dugu. Garapen aldiaren araberako eskaintza egiten da, umeek dituzte beharretan oinarrituta. Oinarri gisa jolas askea dugun arren, jolas askeak forma desberdinak hartzen ditu garapen aldiaren arabera. Horregatik, jolas askearen baitan proposamen eta aukera desberdinak dituzte umeek.

Jolas askearen baitan umeak aukera du garapen osoa kontutan hartzen duen itinerarioa garatzeko; hau da, jolas askean dagoen bitartean aukera du dituen behar guztiak (mugimendu, esperimentazio, jolas sinboliko, errepresentazio beharra) asetzeko eta ondorioz, garapenean eta ikaskuntzan sakontzeko. Era berean, adinean aurrera doazela, behar zehatzagoak sortzen dira teknika eta ikaskuntzarekin lotura zuzenagoa dutenak. Eta hauek ere erantzuten dira proposamen analitiko, globalizatzaile eta tailerren bidez.

Aipatu beharra dago, Biziloren eguneroko bizitza dela oinarri eta abiapuntu eta berau lantzeko aukera gisa baliatzen dela. Horregatik, eskolako sarrera-irteera momentuek, hamaiketakoak, eguneroko gertaerak kontutan hartzen dira eta toki pribilegiatua dute. Era berean, umeen interesetatik sortzen diren proiektu zein irteerek errealitatearekin lotura zuzena dute.


Hezkuntza sistema arautura txertatu zarete… Aurrerapauso handia?

Homologazioa komunitatean abiatuta amets handian urrats bat gehiago izan da, nolabait egindako bidearen aitortza. Eta hezkuntzarekin lotuta, homologazioaren indargune Nagusia sinisten dugun hori agerian egiteko aukera ematea eta berau hezkuntza komunitatearekin partekatu ahal izatea da. Beste eskolekin berdinetik berdinera harremanak garatzeko eta proiektuak partekatzeko aukera aukera ematen digu. Eta, familia bezala gure umeak homologatua den eskola batean aritzeak lasaitasuna ematen du.

Zein abantaila ditu Bizilore Eskola Aktiboko hezkuntza sistemak?

Bizilore guretzako komunitatean sortu eta eraikitako proiektu kolektiboa da, honek antolatzeko, harremantzeko eta bizitzeko modu baterako aukerak zabaltzen dizkigu. Bizilorek bertan diharduten umeei konkistak norbere erritmoan garatzeko aukera paregabea eskaintzen die, bere potentzialak garatzeko aukera, eta bakoitza bere buruarekin konektatuta.

Bukatzeko Bizilore sakonago ezagutzeko gogoa duen oro gonbidatuta nahi dugu, gure ateak zabalik dituzue. Guretzako Bizilore ametsak garatzeko aukera eman digun proiektua izan da, eta beraz, ametsak egia bihur daitezkeela sinisten dugula esanez bukatuko dugu.

Informazio gehiago https://bizilore.eus/ webgunean.