Quantcast
Guraso.eus

Yogurinha Borova: “Euskaraz abestu eta haurrekin lan egin nahi nuen. Egungo gizartea ikusita, asko dago oraindik egiteko”

Egunez eta makillaje barik, Eduardo Gabiña argazkilaria da. Gauean, eta agertoki gainean, berriz, Errusiatik etorri zen Yogurinha Borova artista koloretsua bilakatzen da. Pertsona bera diren arren, ez dutela elkarren artean antzik dio Gabiñak.

Gaur egun, lanordu gehienak argazkilari baino gehiago, Borova moduan egiten ditu, eta, zaila den arren, erabakiarekin gustura dagoela dio: “Euskaraz abestu eta haurrekin lan egin nahi nuen; hala ari naiz orain, eta pozik nago. Egungo gizartea ikusita, asko dago oraindik egiteko. Egia da gauza asko aldatu direla, baina argi daukat oraindik borrokatu egin behar dugula arlo askotan”.

Gabiñak ere entzun behar izaten ditu gustatzen ez zaizkionak, eta, kontatzen duenez, zoritxarrez, hala zen haurra zenean ere: “Ez dakit horregatik naizen hain lotsatia, baina gogoratzen dut eskolan ezkutuan egoten nintzela, atzean. Mutila ala neska nintzen galdetzen zidaten. Azkenean, ohitu egiten zara, baina bai, nik ere gauza asko ikusi ditut. Nire bizitza ez da perfektua, lotsatia eta beldurtia naiz; bada, mozorroarekin bada ere, mezu horiek zabaltzen saiatzen naiz”.

Borovak ez du erantzun bera jasotzen haurrekin edo helduekin dagoenean. “Umeak lehenengo minutuetan flipatuta daude, begira-begira geratzen dira, baina gero, segituan sartzen dira; eta jarrera hori ez badute, normalean, atzean dituzten helduek ez dutelako normaltzat hartzen izaten da; horretarako nago, ni bezalakoak daudela erakusteko. Helduen saioetan, berriz, hiria edo herria den eragiten du, eta herritik herrira ere asko aldatzen da.

Yogurinha Borovak youtube kanala du eta bertan ditu, beste batzuen artean, neska-mutikoentzako egindako abestiak. Jarraian duzuena urte honetako maiatzean estreinatutako Sentipenak askatu abestia da.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude