Quantcast
Guraso.eus

Ttak-ek eta Txatxilipurdik AUSORTU gazteentzako sormen laborategiak antolatu dituzte bigarrenez.

AUSORTU 15 eta 25 urte bitarteko gazteei diziplina artistiko ezberdinetara hurbiltzeko eta horietan trebatzeko eta sormena lantzeko egitasmoa da. Joan den urtean bi diziplina artistiko landu zituzten: arte plastikoak eta musika. Parte hartzaileek saioak oso ondo baloratu zituzten eta beraiei egin zizkietan galderetatik hautatu dituzte aurtengo diziplinak: musika eta literatura. Diziplina horiek lantzeko, egun bateko bi laborategi antolatu dituzte urria eta azaroa bitartean. Saio horietan, praktikatik eta lagunarteko giro atseginean diziplina bakoitzean barneratzeko aukera izango dute parte hartzen duten gazteek.

Saioen gidari musikan eta literaturan diharduten Euskal Herriko bi gazte erreferente izango ditugu.

Olatz Salvador

Musika laborategia Olatz Salvadorrek dinamizatuko du urriaren 26an. Olatz Salvador 1990. urtean jaiotako artista donostiarra da. Ikasketaz psikologoa, txikitatik musikarekin harremanetan egon den arren, piano eta solfeo ikasketak izan ziren musikarekin izandako lehen harreman formala. Gerora gitarra, baxua, harmonia eta ahots teknika ikasi ditu. Skakeitan taldearekin hasi zen 2010. urtean eta ordutik bertan dirau, azken urteetan bere bakarkako proiektuarekin uztartuz. ‘Zintzilik’ (2018, Airaka) du izena bere bakarkako estudioko lehen lanak.

Musika sorkuntza prozesu guztia aztertuko dugu, kantu bat nondik has daiteken eta zein izan daiteken den lehen aletik amaitutzat eman arte egiten duen bidea, besteak beste. Gure sormena landuko dugu dinamika ezberdinen bitartez eta instrumentu ezberdinak baliatuz eta musika eta hitzak sortzeko baliabide desberdinak ezagutuko ditugu.

Paul Beitia

Azaroaren 23an Paul Beitiaren txanda izango da, literatur laborategia gidatuko du. Paul Beitia Ariznabarreta (Getaria, 1997) Euskal Ikasketetako ikaslea da gaur egun. ITU literatur bandaren sorreran parte hartu zuen eta Lekore aldizkariaz arduratzen da 2015etik hona, gainontzeko bandakideekin batera. Berrian eta Gedar Langile Kazetan kolaboratu izan du.

Zertarako literatura galdetzea zertarako bizi edo zertarako ulertu galdetzea bezain absurdoa eta, era berean, beharrezkoa da. Beraz, zertarako literatura? Zertarako idatzi, zertarako irakurri? Horrexetarako: bizitzeko, bizi duguna eta gaituena hobeto ulertzeko. Ikastaro honetan idazteaz eta irakurtzeaz jardungo dugu, idatzi eta irakurri egingo dugu, bi ekintza horiek modu kolektiboan baino ulertu ezin diren ideiatik abiatuta. Elkarrekin sortuko dugu: guk idatzia besteei irakurriz, besteei entzunetik abiatuz, elkarri iritzia emanez.

Sormen laborategi hauek egun osoko saioak izango dira, tailerrak goiz eta arratsaldez egingo ditugu eta tartean gazteek eta artistek elkarrekin bazkaltzeko aukera izango dute.

BALDINTZAK
15-25 urte arteko gazteak


Matrikula
saio bakarra 15 euro
bi saioak 25 euro


Plaza mugatuak: 20 pertsona gehienez
• Izena emateko azken eguna, saioa baino aste bete lehenago
o MUSIKA urriak 18
o LITERATURA azaroak 15


Ordutegia: 10:00-14:00 // 16:00-18:00


Tokia: Etxaluze eraikina


Bazkaria: Jai Zale tabernan bazkalduko dugu denok elkarrekin


IZENA EMATEKO: https://labur.eus/izenemateaAusortu edo Txatxilipurdi (943795446) / AED (943771228)


Utzi erantzuna

Zure e-posta helbidea ez da argitaratuko. Beharrezko eremuak * markatuta daude