Quantcast
Guraso.eus

Polita da koskortuta gero ere ipuinak entzuten jarraitzea

Ohikoa da ume txikiei ipuinak irakurtzea. Erraz egiten dugu bospasei urte bete artea. Baina zer gertatzen da gero? Irakurtzen ikasten dutelako alboratzen dugu ipuinak ozen kontatzeko ohitura?

Denetik egongo da hor. Umeak handitzen doaz eta “handien gauzak” egin nahi izaten dituzte, eta helduek kontatutako ipuinak entzutea txikien kontuak direla pentsatzen dute. Baina tartean egongo dira baita ere helduok ditugun beldurrak eta ezinak. Gero eta haur nagusiagoak izan gero eta zorrotzagoak dira gurekin, eta gero eta lan zailagoa da intereseko zerbait eskaintzea haien arreta eta atentzioa mantentzeko.

Onura handiak

Luze emango luke ikerketa honek. Kontua da adin batetik aurrera joera nagusia dela umeei ipuinak kontatzeari uztea, eta ez gara konturatzen zer nolako onura handiak dituen horrelakoetan jarraitzeak.

Helduen eta haurren artean sortzen den harreman bereziaz gainera badira neska-mutikoentzako garrantzitsuak diren bestelako onurak ere. Atseden mentala eskaintzen du ozen irakurritako ipuin edo istorio bat entzuteak. Testuaren ulermenean ere laguntzen du, eta arretaz entzuten ikasteko bikaina da. Noski, garrantzitsua da gazteen arreta deituko duen istorio bat aukeratzea.

  • Atseden mentala. Gure lana entzutea besterik ez denean atseden hartzen dugu. Bakarrik entzule… Badira irakasleak ariketa hori egiten dutenak neska-mutikoak jolastokitik itzuli eta ondorengo minutuetan. Hamar minutu. Eseri eta istorio baten zati bat entzun. Lasaitu egiten dira ikasleak eta zentratu egiten dira hurrengo jarduera egiteko.
  • Istorio batean beti gertatzen dira gauzak eta gure lana entzutea bakarrik denean hobeto ulertzen dugu trama. Neska-mutikoei batzuetan kosta egiten zaie irakurtzen dutena ulertzea. Kontakizunak maiztasun batekin entzuteak laguntzen du hiztegia aberasten, esamoldeak ezagutzen, erregistroak desberdintzen… Eta kontalariak irakurketa bizia egiten badu eta pertsonaien arteko elkarrizketak ondo bereizten baditu zer esanik ez! Entzuleak asko ikasiko du eta testuaren ulermenean aurrera egingo du.
  • Testu luzeak jarraitzeko zailtasunak dituztenentzako ere onuragarria da istorioak entzutea. Ahozkotasuna beti da arinagoa eta testuaren poliki-poliki luzera handitzen joan daiteke.
  • Eta tarte txikia dago istorioak entzutetik istorioak irakurtzera. Ipuinak entzuteko zaletasuna hartzen duten neska-mutikoek laster egingo dute hegan istorio gehiagoren bila. Entzule on bat irakurle on bat izango da seguruenik.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading