Quantcast
Guraso.eus

Plana familian: Atxuriko bide berdea, Bizkaian

Mungiako geltoki zaharreko aparkalekuan emango diogu hasiera 3,8 kilometroko ibilbideari. Uriguen parke ederrera iritsiko gara lehenengo. Bertan askotariko zuhaitzak daude –bertakoak zein exotikoak–, eta baita ere Landetxo Goikoa baserria. XVI. mendeko eraikuntza da eta adituen esnaetan Bizkaiko zaharrena.

Jolaserako leku aproposa da Uriguen parkea. Belardi zabalak, eta neska-mutikoentzako jolas parkea ditu besteak beste. Aparkaleku ederra ere badu.

Uriguen parketik Atxuriko haranetako zelaietara joko dugu. Erraz iritsiko gara Zabalondoko geralekura eta bertatik Atxuriko landa-gunera. Bidean lasaitasuna da jaun eta jabe.

Laukarizera doan eskualde-errepidea gurutzatu eta industriagunea inguratuko dugu asfaltozko bidearen amaierara iritsi arte.

Laster bueltatuko gara bide eder eta berdeetara. Butroe ibaiaren gainetik joango gara, bista ederrak lagun ditugula. Ibilbidea zelai batean bukatzen da, Artebakarra mendi-hegalean.

Trenbide zaharra

Atxuriko bide berdeak XIX. mende bukaeran funtzionatzen hasitako tren baten bidea da. Sondika eta Mungia udalerriak lotzen zituen hamaika kilometroko ibilbidea eginez. 1950eko hamarkadan tren elektrikoak lurrun-trena ordezkatu zuen, eta 1977. urtera arte martxan egon zen.

Iturria: Euskadi turismo hemen.

Landetxo goikoa baserria. Egilea: Zaloa Etxaniz. Iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading