Quantcast
Guraso.eus

Parte hartzaileak oso pozik futbol egokituko topaketetan

Gipuzkoako Kirol Egokituen Federazioak futbol egokituko topaketak egiten dihardu. Hiru dituzte aurreikusita. Usurbilen egin zuten lehenengoa, Bergaran bigarrena eta Legazpin hirugarrena. Bergarako topaketan 10 urtetik 19ra bitarteko hamabost gaztetxok hartu zuten parte.

Federazioko koordinatzaile Josu Zubiak halakoak egitearen garrantzia azpimarratu du: “Umeak eta gaztetxoak oso pozik etortzen dira, gustatzen zaie kirola egitea, beste pertsona batzuekin erlazionatzea. Batez ere denbora pasa bat da eta ikustean hain ondo pasatzen dutela, guri ere horrek asko betetzen digu. Batzuk ez dute aukerarik futbolean taldean jokatzeko, eta gaurkoa bezalako topaketen bitartez, behintzat aukera ematen diegu desgaitasunen bat dutenei ere futbolean euren artean jokatzeko”, adierazi du Zubiak.

Parte-hartzaileak ere pozik

Antzuolako Gorka Fernandez izan da parte-hartzaileetako bat eta oso pozik azaldu da: “Esperientzia berezia da eta oso pozik gaude, ondo pasatzeko asmoz etorri gara. Gainera, futbola asko gustatzen zait eta gaurkoa aukera oso ona da bestela futbolean jokatu ezin dutenentzako. Lagunak egiteko ere balio izaten du gaurkoaren moduko topaketek”.

Bergarako Markel Barrocal ere oso gustura aritu da: “Oso ondo doa eta guztiei animatzen diet jokatzera etor daitezen. Futbola asko gustatzen zait, lagun guztiekin jokatzea atsegin dut”.

Nahi izanez gero kirola tresna baliagarria izan daiteke makina bat muga gainditzeko.

Albistearen iturria eta argazki gehiago hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading