Quantcast
Guraso.eus

Onditz Mendizabal: “ Ume batek hasteko eta hezteko sormenaren bidez eraikitzen du bere mundua”

Onditz Mendizabalek Arte Ederrak ikasi zituen eta EITBn ibili zen lanean. Baina umeekin eginiko hainbat proiektuetan konturatu zen umeekin egotea asko gustuko zuela. Hortaz, 2014an, sormenaren inguruan lanean hasi zen. Momentu horretatik aurrera, eskolaz-eskola dabil sormena lantzen, “Sormening” deituriko egitasmoarekin.

Onditz Mendizabal, “Sormening” egitasmoaren koordinatzailea, umeekin

Zer da sormening?

Sormening-ak ez du definizio zehatz bat, izan ere, hainbat gauza sartzen dira bere barnean. Sormenaren aitzakiarekin pertsona bakoitzari handitzeko indarra ematea da sormening-aren helburu nagusietako bat. Azkenean, gauzak sortzearen bitartez, pertsona bakoitzaren barnealdea lantzen dugu. Eta sarritan umeek egindako produktu hori etxera eramatea dute helburu, baina prozesuan ikasten dutena asko ere baliotsuagoa da. 

Guzti hau gauzatu ahal izateko, bi motatako sormening-a egiten dugu; belaunaldi sormening-a eta familia sormening-a. Lehenengoan nagusiak eta DBH3ko ikasleak biltzen ditugu. Bertan hainbat jolas egiten dira; kartak, jolas alternatiboak, marrazkiak… Eta elkarrekin jolastean elkar aberasten dira. Adibidez, gazteek “UNO” jokoa nola jolasten den erakusten die nagusiei, eta nagusiek gazteei Briskara nola jolasten den. Eta oso elkarrizketa interesgarriak irtetzen dira bertan. Modu berean, jokuekin batera elkarri galderak egitea eskatzen diet. Horrela, bata besteagandik gehiago ikasten dute eta bakoitzaren esperientzia eta bizipenak ezagutzen dituzte modu erakargari batean.

Familia sormening-ean ume zein gurasoek asko disfrutatzen dute, eta umeek aita edo ama haiekin tenperakin marrazten ikustean, harrituta geratzen dira askotan. Batzuetan gurasoek umeek baino hobeto pasatzen dute zenbait eskulan egiten, eta umeak oso pozik jartzen dira horrelako momentuak bizitzean. Familian sortzen den elkargune edo magia hori ikaragarri berezia da.

Belaunaldi Sormening-a

Zein leku beharko luke sorkuntzak haur baten hezkidetzan?
Sekulako lekua beharko luke. Ume batek hasteko eta hezteko sormenaren bidez eraikitzen du bere mundua. Askotan gurasook tablet bat edo horrelako bat ematen diegu umeei, errezena delako. Baina umeari zenbait material eman ezkero, umeak berak hartuko du bere bidea, bere jolasa… Haiei aukera eman behar zaie haien aukerak hartzeko. 

Adibidez, pasa den astean, umeekin koloreen jolas bat egin genuen. Ume bakoitzak prozesu bat egin zuen; batek ortzadarraren koloreak marraztu zituen lerroan, beste batek kolore guztiak nahastu zituen eta txundituta geratu zen dena marroia geratzen zela ikusterakoan… Horretan datza sormening-en funtsa. Bakoitzak bere bidea hartzea eta norberaren denbora eta pausoekin ikasten joatea. Nik pista txiki batzuk bakarrik ematen ditut, gidari modura, baina bakoitzak hauek jarraitu edo ez erabakitzen du.

Sormenaz gain, beste hainbat esparru lantzen dira?
Askotan taldean daude, eta taldean ikasten dute; enpatia, talde lana, emozioen kudeaketa… Eta sormening-en ez dago ezer txarto. Akatsetatik aurrera egin behar da, hauetaz ikasi egin behar da. Eta hori ez da bakarrik sormening-erako, baizik eta bizitzarako. Elkar ulertzen, entzuten, laguntzen… ikastea ezinbestekoa da beraien garapen pertsonalerako. Eta sormening-en bitartez garapen hori lantzea dugu helburu. 

Norbaitek interesa badu nora jo behar du?
www.sormening.com webgunean informazio guztia topa dezakezue, baita nire kontaktua ere bai. Edozein zalantza izan edo eta Sormening munduan sartu nahi izanez gero, jarri nirekin kontaktuan.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading