Quantcast
Guraso.eus

Nafarroako ‘Musikariak ikastetxeetan’ programa aitzindariak balorazio oso ona jaso du eta jarraipena izango du

Programak, aurten, 88 saio eskaini ditu Nafarroako 43 ikastetxetan. Datorren ikasturtera begira 191 saio egitea dago aurreikusita, eta hala eskatzen duten ikastetxeetan egingo dira.

Jarraipena izango du Musikariak Ikastetxeetan programak. Hala iragarri du jarduneko Hezkuntzako kontseilari Mara Solana Aranak. Ikasturte honetan abiarazi dute, eta harrera oso ona izan duela adierazi dute protagonistek.

Balorazioa hain ona izanik gutxienez beste hiru urtez jarraipena izango duela erabaki dute. Arlo didaktikoa indartzeko, gainera, unitate didaktikoak sortuko dituzte aukera izateko ikasgeletan lanean jarraitzeko.

Programa 14 eta 18 urte bitarteko gazteei dago zuzenduta eta musikaren bitartez euskararen transmisioa bideratzea du helburu. Horrekin batera euskal kantugintzaren panoramako abeslariak eta sortzaileak gazteen artean ezagutzera ematea.

Horretarako abeslariek zein musika sortzaileek bisitak egiten dituzten ikasgeletara. Musika ohituren inguruko solasaldiak egiten dituzte, zuzenekoak eskaintzen dituzte, eta gazteen galderak erantzuten dituzte.

90 minutu inguruko saioak izaten dira, eta eskaera egin dezakete DBH 3, DBH 4 eta batxilergoko ikasleak dituzten ikastetxeek. Euskaraz edo euskara ikasgai moduan duten ikasleekin egiten dira saiook. Hezkuntza Departamentuko Euskara Atala arduratuko da programaren antolaketaz.

Musika protagonista

Mikel Inun, Rafa Rueda, Pelax, Zuriñe Hidalgo, Amorante, Xabi San Sebastián eta Jon Gurrutxaga dira programan parte hartu duten euskal sortzaileetako batzuk.

Zuriñe Hidalgo abeslariak ekimen honetan parte hartzeak musikarientzako dakarren esperientziaren inguruko balorazioa egin du. “Guretzako aukera paregabea da eta ardura handi, batez ere emakume abeslariontzako; izan ere, neska gazteentzako erreferentzia izateko ardura dugu gutxi baikara musikan gabiltzan neskak”.

2019-2020 ikasturtean 41 musikari gerturatuko dira Nafarroako institutuetara. Horien artean izango dira Alex Sardui, Eñaut Elorrieta, Gorka Urbizu, Ines Osinaga, Izaro Andres, Joseba Tapia, La Basu, Mursego, Maite Larburu, Gari edo Mikel Urdangarin.

Argazkiaren iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading