Quantcast
Guraso.eus

Mugikortasun zailtasunak dituztenen errealitatea neska-mutiko gazteei gerturatzen

Mugikortasun zailtasunak dituzten oñatiarren elkartea da Trauti, eta urtero moduan sentsibilizazio kanpaina egin dute herrian. Trauti Eguna egiten dute eta horrekin batera neska-mutikoentzako ekintzak antolatzen dituzte. Oraingo honetan 2014ko Goya sarietan animazio film onenaren saria eskuratu zuen Cuerdas laburmetraiaren zuzendaria gonbidatu dute Oñatira. Pedro Solis da bera eta kataluniarra da.

 

 

 

 

 

Herriko ikastetxeetako bosgarren mailako neska-mutikoekin elkartu da Solis, eta azaldu die animaziozko lan bat nola egiten den eta batez ere istorioa egiteko inspirazioa nondik sortu zitzaion. Bi seme-alaba ditu Pedro Solis zine zuzendariak, bata garun-paralisi sakonarekin. Esperientzia pertsonaletik abiatuta egin zuen Cuerdas . “Nire seme-alaben istorioa kontatzen du film laburrak. Garun-paralisi larri batekin jaio zen nire seme Nicolas eta zaintza handia eskatzen zigun guri horrek. Jeloskor jarri beharrean gure alabak justu kontrakoa egin zuen… Bere eguneroko jolasak anaiarekin partekatzen hasi zen, eta gaur egun ere horrela da. Alaba da, oraindik ere, nire semearen estimulurik handiena”, azaldu du Solisek. 

Mugikortasun zailtasunak dituzten pertsonen errealitatea neska-mutiko gazteei gerturatzea garrantzitsua dela iritzi diote bai Pedro Solisek bai Trauti elkarteko kideek. “Urtero egiten ditugu sentsibilizazio saio batzuk neska-mutikoekin; izan ere, uste dugu erakutsi beharra dagoela elbarritasuna zer den eta zer suposatzen duen”, azpimarratu du Trautiko kide Lukene Igartuk.

Hunkigarria izan zen Solisek Oñatiko neska-mutikoekin izandako saioa. “Umeek galdera mordoa egin dizkiote eta Solisek oso ondo konektatu du beraiekin”, esan du Igartuk. “Etortzeko eskaera egin genionean ez genuen uste onartuko zuenik baina berehala esan zuen baietz eta oso atsegina izan da”.  

2014koa da Cuerdas eta Solisek azaldu du irakasle asko etorri zaizkiola esaten ikusi ostean neska-mutikoen jarrera aldatu egin dela. “Adierazi didate ikusi aurretik gurpildun aulkian zeuden ikasle batzuk beti bakarrik zeudela jolas orduan, eta eskolan filma ikusi ondoren ume horiek ez direla sekula berriz bakarrik egon”, adierazi du.

Argi dago sentsibilizazio lanak baduela eragina. “Antzerako egoerak gertu ditugunok sentsibilizatuta gaude eta hobeto ulertzen ditugu. Badira urte batzuk ikasleetzako ere ekintzak antolatzen ditugula eta uste dugu poliki-poliki ari garela pausoak ematen”, esan du Igartuk. 

Laburmetraia ezagutzen ez baduzue hemen duzue ikusgai (gazteleraz).

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading