Quantcast
Guraso.eus

Monika Marco: “Bitartekaritza gatazkak konpondu eta prozesu judizialak ekiditzeko tresna bat da”

Ahots & us bi bazkidek zuzentzen dute: Monika Marco, gizarte hezitzailea, eta Naiara Muriel, gizarte langilea. “Ahots & us” familia- eta komunitate-bitartekotzako proiektuaren bultzatzaile biak.

Aspalditik ezagutzen dute elkar, hezitzaile gisa bat etorri ziren jokabide arazoak dituzten adingabeentzako egoitza baliabide batean, eta geroztik adiskidetasun harreman batek lotzen die. Duela denbora bat, karrera profesionalak berriz bideratzea erabaki zuten, eta, azkenean, bitartekaritzaren esparruan espezializatu ziren. Orain Abadiñon dute zentroa, eta bitartekaritza zerbitzua eskaintzen dihardute.

Monika Marco eta Naiara Muriel, “Ahots & us” familia- eta komunitate-bitartekotza

Zer da bitartekaritza prozesua?

Inplikatutako alderdiek haien beharretara egokituko den akordio bat sortzeko tresna da bitartekaritza prozesua. Bi aldeentzat onuragarriak diren akordioak lortzen direnez, horiek denboran irauten dute, etorkizunean arazoak saihestuz. Bitartekaritza, gatazkak konpontzeko metodo alternatibo gisa, berezko printzipioen arabera arautzen da, diziplina anitzeko teknikak arlo horretan prestakuntza espezifikoa duen profesional baten bidez konbinatuz. Profesional horrek ez du erabakitzen, ez du konponbidea inposatzen, eta aurrez aurre dauden aldeei beren gatazka komunikatzen eta modu positiboan kudeatzen laguntzen dien bideratzailea da.

Zein da bitartekariaren rol-a?
Bitartekaritzaren profesionalak ez ditu alternatibak proposatzen, ezta konponbideak ere; gatazkan inplikatutako aldeei arazoari alternatiba posibleak bilatzen laguntzeaz arduratzen da, hau da, alderdien arteko komunikazioa kudeatzeaz arduratzen da, behar besteko giro adeitsua sortuz, alderdiak etorkizunerako alternatibak proposatzen has daitezen eta iraganeko egoerak gaitzesteari utz diezaioten.

Bitartekaritzaren profesional gisa, gatazkak agertzen diren gizarte- eta kultura-testuingurua ulertzeko gaitasuna eskuratu behar da, arazoa errealitateak eskaintzen dituen ikuspegi desberdinetatik ikusteko eta testuinguru egokian kokatzeko gai izan dadin. Bitartekaritza-prozesu bat hastea komeni den ala ez baloratu behar du, eta behar besteko trebetasuna izan behar du gertaeren eremuan kokatzeko eta gatazkan dauden alderdiak modu positiboan hurbiltzen hasteko.

Zeintzuk dira bitartekaritzaren onurak?

Komunikazioa eta bizikidetza baketsua sustatzen ditu, bitartekariak enpatia eta aldeekiko entzute aktiboa lantzen ditu, komunikazio-kanala aurkitzen laguntzen die, errespetutik komunikazio baketsuaren oinarriak senti ditzaten. Gainera, prozesu judizialak baino metodo azkarragoa da eta atzerapena saihesten du, alderdiek eta bitartekariak kudeatzen baitituzte denborak, eta ez dago seinalamendurik, ikuspegirik, errekurritzeko denborarik. Ohikoena asteroko saioak dira (aldeen agendaren araberakoak), eta hau motibagarriagoa da. Akordio partzialak lortzen doaz, pixkanaka eta bitartekaritza-prozesuak aurrera egin ahala, gatazka leuntzen doa.

Perfilik ba al dago zuen zentrora joateko?

Ez dago perfil zehatzik. Gatazkaren bat daukan pertsona oro etor daiteke gurera; familiaren barneko gatazkak, lagunen artekoak, bizilagunen artekoak… Gatazka baldin badago, bitartekaritza tresna bikaina da akordio batera heltzeko.

Informazio gehiago behar izanez gero sartu ahotsandus.com webgunera. Bertan gure kontaktua aurki dezakezue, bitartekaritzaren munduaren beste hainbat informaziorekin batera. Gure bloga ere bisita dezakezue.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading