Quantcast
Guraso.eus

Meningokokoaren serotipo gehiagorengandik babestuko duen txerto berria urritik aurrera

Urrian aldatuko dute haurrak txertatzeko Euskal Autonomia Erkidegoan indarrean dagoen egutegia.

Aldaketak 2008. urtean jaiotako neska-mutikoei eragingo die. Meningitisaren aurkako neurri gisa aurkeztu du Nekane Murga sailburuak. 2001-2007 urteen artean jaiotakoek, berriz, txerto berri bat hartu beharko dute.

Orain arte C meningokokoari aurre egiteko txertoaren hiru dosi jasotzen zituzten EAEko neska-mutikoek. Lehen dosia lau hilabeterekin, bigarrena hamabi hilabeterekin eta hirugarrena hamabi urterekin. Hirugarren dosi hori da urritik aurrera ordezkatuko dutena. Hala, A, C, W eta Y meningokokei aurre egiteko txerto berria da jasoko dutena. Europan zein Ameriketako Estatu Batuetan eta Kanadan, meningitis gisa ezagutzen den gaixotasun meningokozikoaren epidemiologian aldaketak gertatu direla hauteman ostean hartu du erabakia Txertaketen Aholku Batzordeak. W eta Y serotipoek eragindako kasuek gora egin dute pixkanaka.

Hala, 2008. Urtean jaiotako neska-mutikoen artean izango du eragina aldaketak ikasturte honetan. Neska-mutiko horiei jarriko zaie lehen aldiz txerto berria, eta urritik aurrera izango da hori.

Nagusiagoendako ezohiko txertaketa-kanpaina

Aldi berean, 2001etik 2007ra jaiotako neska-mutikoei eragingo dien ezohiko txertaketa-kanpaina ere egingo du Osakidetzak. Gazte horiek dagoeneko jaso dute C meningokokoaren aurkako hirugarren dosia, baina txerto osagarri bat jasoko dute A, W eta Y serotipoen aurka babestuta geratzeko.

Ezohiko txertaketa-kanpaina urtarrilaren bigarren astean hastea aurreikusten dute. Ikasturte honetan 2001., 2002. eta 2004. urteetan jaiotako gazteak hartuko dute txertoa. Hurrengo ikasturtean 2003. Eta 2005. Urteetan jaiotakoen txanda izango da, eta 2021-2020 ikasturtean 2006. eta 2007. urteetan jaiotakoena. Ikastetxean edo unibertsitatean jarriko zaie txertoa. Ikastetxeen kasuan gurasoei edo tutoreei informazioa emango zaie eta txertoa hartuko duen ikasle bakoitzari dagokion baimena eskatuko zaio. Txertoa osasun-zentroetan ere egongo da eskuragarri eskolaratuta ez dauden guztientzako zein ikastetxean txertoa hartu ezin duten guztientzako

Zer da meningokokoa

Meningokokoa gaixotasun larriak eragin ditzakeen bakterio bat da, batez ere meningitisa (garuna eta bizkarrezur-muina estaltzen duten mintzen inflamazioa) edo sepsia (inflamazio orokorra).

Haurrak eta nerabeak dira gaixotasun horrekiko esposizio handiena duten kolektiboak. Gaixotasun horrek bat-bateko sukarra, buruko min handia eta, askotan, goragalea eragiten ditu.

Iturria eta informazio gehiago hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude