Quantcast
Guraso.eus

Karmen Gerrikagoitia: “Hezkuntzan ez da aniztasun funtzionalaren errealitatea ezagutarazten”

GeuBe behar bereziak dituzten familien elkartea da eta Durangon kokatuta dago. Proiektua 2001.urtean hasi zen gurasoen ekimenari esker. Bi urte geroago elkarte bilakatu zen eta inguruko aniztasun funtzionala duten pertsona guztientzako erreferentzia tokia ere. Gaur egun, ekimen bereziak egiten dituzte aniztasun funtzionalaren errealitatea ezagutarazteko. 

Karmen Gerrikagoitia, Oierren ama eta GeuBeko presidentea

Zer da GeuBe?

Geu Be behar bereziak dituzten familien elkartea da. Gure seme alabak eskola bukatzean etxean geratzen ziren, noraezean. Beraz, elkartea sortzea erabaki genuen. Boluntarioekin bildu ginen eta pixkanaka Geube sortu genuen aniztasun funtzionaleko pertsona zein familien beharrak asetzeko. Gure seme alabak txikiak direnean ez da behar hori sumatzen… Baina handitzen doazela argi nabaritzen da batzuetan bakarrik sentitzen direla. Beraien anai edo arrebak kalera joaten dira lagunekin, bere eskolakideak arratsaldetan geratzen dira… baina gure seme alabak etxean geratzen dira bakarrik. Hori ikusita, inklusiorako elkartea sortu genuen gurasoon artean.

GeuBe bereziki aisialdirako elkartea da. Sukalde tailerrak egiten ditugu, igerilekura goaz, astebukaerak antolatzen ditugu… Haientzat gure lokala erreferentzia puntua da; mahai-jokoetara jolasten dute, dantzatzen dute… lagunen lokala da azken finean.

Isilpeko errealitatea da aniztasun funtzionala?

Nire ustez gaur egun ezagunagoa da. Hala ere, komunikabideek lan handiagoa egin beharko lukete gai honen inguruan. “Gizagaixoak” hitza alde batera utzi eta errealitate hau azaleratu behar dute. Haiekin hitz egitea, haiei aukera bat ematea oso garrantzitsua da. Bestalde, eskuragarritasunari dagokionez arazoak ditugu oraindik. Sarritan asteburuan hondartzara joatean… oztopo handiekin topatzen gara; aldapak, espaloiak… Beraz, nahiz eta egoera hoberantz joan lan handia dago oraindik egiteko.

Haurrei errealitate hau erakutsi behar zaie?

Nire ustetan hezkuntzan ez da errealitate hau ikusi nahi eta oso garrantzitsua da txikitatik gai hau lantzen joatea. Gogoratzen dut nire semea eskolan integratua zegoela esan zidala irakasle batek. Egia da klasean integratua zegoela, talde euskarri baten bitartez, baina eta patioan? Nire ustez integrazioa patioetan hasten da, lagunekin jolasten, elkar ezagutzen.
Horretarako helduok bidelagun izan behar gara, gaia lantzen eta normalizatzen.

Nola hezi behar ditugu gure seme alabak aniztasun funtzionalarekiko?

Etxean zein eskoletan hasi behar da integrazio lana. Inklusioa harremanetan, ezagutzean eta aniztasunaren edertasuna ikustean lortzen da. Pasa den urtean ekimen berri bat izan genuen; Durangaldeko hainbat eskoletara joan ginen gure seme alabekin. Gurpil aulkiak eraman genituen eta egunero gainditu behar dituzten oztopoak erakutsi genizkien. Tailerra oso arrakastatsua izan zen. 

Nola lagundu dezakegu gurasook gure seme alaben jarrera egokiagoa izan dadin aniztasun funtzionala duten umeekiko?

Oso garrantzitsua da gure seme alabekin honen inguruan hitz egitea. Nik ezagutu ditut ume batzuk beldurtuta zeudela nire semearengana hurbiltzeko; aniztasun funtzionala zuelako. Guzti hori etxetik transmititzen da. Familia giroan gaia behar bezala lantzea garrantzitsua da inklusiorantz pausu bat aurrera emateko.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading