Quantcast
Guraso.eus

Juan de Vicente Abad: “Ikastetxeetan jazarpen egoerak badaude isilik dagoen ikusle asko daudelako da”

“Posible da ikastetxeetan ematen diren tratu txar egoerak gelditu. Gakoa begira dauden edo lekuko pasiboak diren gainerako guztiak dira. Esku hartzea erabakitzen badute asko gutxituko dira antzeko kasuak”. Horrela uste du gatazken kudeaketan aditua den Juan de Vicente Abad-ek.

“Baliteke teknikoki jazarpen, tratu txar edo bullying kasua ez izatea, baina berdin zaigu. Garaiz detektatzen badugu asko egin dezakegu egoerak okerrera ez egiteko; izan ere, egoera hauetan esku hartzeko gakoa garaiz detektatzea da”, azaltzen du.

Jazarpen motak

Adituak argitzen du tratu txarra hainbat esparrutan eman daitekeela, eta guztiak hartu behar direla oso kontuan.

1. Bazterkeria: pertsona batzuk lekuz kanpo sentiaraztea, alboratzea edo zokoratzea, integratzen ez uztea. “Ezin duzu gure taldean jokatu”, “Ez dut gizarteko lana hori zurekin egin nahi”, “Whatspp taldetik botako dugu”… eta antzerakoak.

2. Hitzezko erasoa: iraintzea, gaitzizenak jartzea, difamatzea edo atzetik gaizki esaka ibiltzea… Horrelakoak bizitza errealean zein sare sozialetan gerta daitezke.

3. Eraso fisikoa: eraso mota agerikoena da. Jotzea, alegia.

4. Zeharkako eraso fisikoa: beste baten gauzak apurtzea, gordetzea edo lapurtzea.

5. Mehatxatzea: bestea beldurtzea, bestea jotzera egitea… “Irteeran itxarongo zaitut” eta abar.

6. Eraso sexuala: gogoz kontrako ukierak egitea, harreman bateko argazki intimoak zabaltzea…

Jazarpenaren ezaugarriak

Jazarpenak hiru ezaugarri nagusi ditu.

1. Asimetria: erasotzaileak erasotuak baino botere handiagoa du. “Horregatik da oso garrantzitsua ikaskideen artean begiratzea detektatzeko nortzuk dauden egoera ahulenean edo zaurgarrienean.

2. Min egiteko nahia: erasotzaileak helburu jakin horrekin jokatzen du. Egiten duena bideratuta dago gainerakoek pertsona baten kolkora barre egiteko edo bizitza pribatuko gauzak airatzen ditu kalte egiteko.

3. Errepikapena
. Egoerak jazarpen kategoria izateko irainak eta tratu txarrak behin baino gehiagotan eman behar dira. Jarrerak errepikakorra izan behar du.

“Garrantzitsua da begira daudenek sentitzea badutela jarrera erasokorrak gelditzeko gaitasuna. Ikastetxeetan babes sozialerako sareak sortu beharko lirateke bazterkeria egoeran egoteko arriskuan dauden ikasleak garaiz detektatzeko eta beraiengana hurbiltzeko. Talde hori behaketa egiteko gertu egongo litzateke, eta beharra duen jendearengana hurbiltzeko eginkizuna izango luke. Ikastetxeetan jazarpen egoerak badaude isilik dagoen ikusle asko daudelako da. Jazarpena denon aurrean gertatzen den zerbait da”.

Iturria: AprendiendoJuntos

Argazkiaren iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading