Quantcast
Guraso.eus

Jone Zalduegi: “Zaintzarik gabe dabiltza umeak mundu digitalean”

Emoki elkarteko kidea da Jone Zalduegi eta hainbat bideo-joko, sare sozial eta jarduera digital ditu hizpide gurasoentzako egiten dituen formakuntza saioetan. Gurasoei adi-adi egoteko eskatzen die.

“Bideo-jokoekin ikusten ditugun bi arazo potoloenak dira umeek denbora asko pasatzen dutela jolasean eta ez direla konturatzen zein eragin duen jarduera horrek beraien emozioetan”. Argi hitz egiten du Zalduegik. Antzeman dute bai familiek bai eskolek erreminta gehiago behar dituztela gertatzen ari denaren aurrean nola erantzun jakiteko.

Brawl Stars, Fortnite eta GTA bideo-jokoak aipatzen ditu. Tik Tok sare soziala ere bai, eta, horrekin, batera gamer edo influencer diren youtuberren bideoek umeen egunerokoan duten eragina. “Guraso askok ez daki umea zein jokotan ibiltzen den, edo, jakinda ere, ez daki joko horretan zer dagoen. Ikusten dituzte marrazki itxurako skin-ak edo pertsonaiak, eta odolik ez dagoenez lasai daude. Baina horiek guztiak jokalari gazteak erakartzeko ondo pentsatutako mekanismoak dira”, azaltzen du adituak.

Entretenimendurako eta estimulaziorako elementu pila dituzte umeek mundu digitalean, eta gurasoek, orokorrean, jarraipen eskasa egiten dute. “Etxe batzuetan ez da gaia batere kudeatzen, eta gurasoak ahaldundu egin behar dira. Begiratu behar dute zein adinetarako jokoak diren eta informatu behar dira edukiaren inguruan”.

Erabilera ohitura onak ezarri

Erabilera arauak ezarri baino gehiago, erabilera ohitura onak ezartzeko gomendioa egiten du adituak. “Ordenagailurik ez logeletan, mesedez”, ohartarazten. Horrekin batera, gomendatzen du umeei galdetzeko zein joko edota sare sozial duten gustukoen eta zergatik. “Ezinbestekoa da gai honi heltzea, bai etxetik, bai eskoletatik, bai erakundeetatik; izan ere, gurasoak eta irakasleak galduta daude. Ez dakite zelan jokatu”.

Esku hartzeko plan integralak landu behar direla uste du, eta, bien bitartean, neska-mutikoak zertan ari diren gertuagotik zaintzeko aholkatzen du.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading