Quantcast
Guraso.eus

Internetek ekarritako komunikazio arau berrietan sozializatu behar dira haurrak ere

Michio Kaku fisikari estatubatuarrak argi dauka. “Ongizatea zientziatik eta teknologiatik dator. Teknologia ondo dago. Teknologiak inguratu egiten gaitu”.

Uste du zientziak eta teknologiak aurrera egiten lagundu diotela gizakiari, eta aurrerapenak olatuka egiten direla. “Orain, Internet dugu. Eta egokitzen ikasi behar dugu. Haurrek ere bai”.

“Hasiera batean gizakiak 30-35 urteko bizi-itxaropena zuen. Bizimodu gogorra zen benetan. Gero zientzia eta teknologia etorri ziren eta poliki-poliki gauzak aldatzen joan dira. XIX. mendean fisikariek energia termikoa aurkitu genuen. Bapore makinak, lokomozio-aparatuak, eta motorrak sortu ziren. Gero, argindarra eta magnetismoa aurkitu ziren, eta hiriak eta herriak argiztatu egin ziren. Irratia eta telebista ere asmatu ziren. Hirugarren olatua ordenagailuena izan da; transistoreak eta laserra aurkitu direlako. Horren ondorioz, Internet sortu da”, azaltzen du zientzialaria.

Aldaketa horiek guztiak garrantzitsuak direla uste du, eta ulertu egin behar direla dio. “Eragina dute jendearen soldatetan, lanbideetan, eta gizarte aldaketetan ere bai”.

Telefonoaren aurkikuntza ipintzen du adibide gisa. “Orain ehun bat urte asmatu zen. Hemerotekara jo besterik ez dago ikusteko zeinen gaizki egiten zuten berba telefonoari buruz. Oso prentsa txarra zuen. Telefonoa mekanikoa eta kaltegarria zela idazten zuen jendea zegoen. Esaten zuten gurasoek ez zutela aurrerantzean seme-alabekin gehiago hitzik egingo baizik eta airean dabilen ahots misteriotsu batekin arituko zirela. Telefonoa lehorra eta antzua zela esaten zuten”.

Jende horrek arrazoia zuela dio Kakuk. “Ez dugu seme-alabekin hainbeste hitz egiten orain, eta ez dugu aurrez aurreko elkarrizketak egiten lehen beste denbora ematen, baina gauza da ikaragarri gustatzen zaigula telefonoa, eta mugak urrundu dituelako gustatzen zaigu. Komunikazio aukerak biderkatu ditu. Horrek esan gura du komunikazio prozesuek gizatiar izateari utzi diotela? Bai, baina nire ustez gizatiar hitzaren definizioa berritu beharko genuke”.

Haurrak eta teknologia

Hainbat gurasoren e-mailak jasotzen dituela dio zientzialariak. “Arduratuta daude seme-alabek denbora gehiegi ematen dutelako Internet-en. Erantzuten diet telefonoa asmatu zenean ere protokolo berri bat sortu zela. Norbaitek deitzen bazaitu noiz deitu behar diozu zuk? Zenbat denboraz egin behar duzu berba? Deitzen dizuten aldiro erantzun behar duzu?… Telefonoa agertu zenean komunikazio arau berriak sortu ziren, eta orain Internet dugu”.

Neska-mutikoek komunikazio arau berriak ezagutu behar dituztela uste du Kakuk, eta trebatu egin behar ditugula uste du. “Komunikazio kanal berri bat da Internet. Ona da erabiltzea; izan ere, laguntxo guztiek erabiltzen dute. Hori da etorkizuna. Ohitu egin beharko gara. Baina haurrak sozializatu egin behar dira. Hori da gakoa”.

Argazkiaren iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading