Quantcast
Guraso.eus

Iñaki Iturriotz: “Asko exijitzen diogu eskola kirolari, hezkuntzaren parte da”

25 urte baino gehiago dira Gipuzkoako Foru Aldundiak Eskola Kirola programa martxan jarri zuela. Iaz birmoldatu zuten programa. Erronka zen, bereziki, genero ikuspegitik antzematen ziren aldeak gutxitzea. Gipuzkoako Foru Aldundiko kiroletako zerbitzuburu Iñaki Iturrioz eman du emaitzen berri.

6-16 urte bitarteko neska-mutikoei zuzendua dago Eskola Kirola programa, Gipuzkoan. Eusko Jaurlaritzak arautzen du dekretu bidez, eta Foru Aldundiek garatzen dute Foru Agindu bidez. “Gipuzkoan oinarrizko eskaintza da eskola kirola. Ikastetxeen bidez eskaintzen dugu eta neska-mutiko guztiek lehiaketetan zein topaketetan parte hartzeko aukera dute. Gero, eta osagarri moduan, klubek gidatutako saioetan parte hartzeko aukera dute”.

Jolas Hezi’ programa berria

Programak 25 urte betetzen zituela eta zenbait egokitzapen egin zituzten iaz. Genero ikuspegitik ematen ziren errealitate batzuk ikusita eta horietan eragin nahian sortu zuten Jolas Hezi programa. “Emaitzak ez dira txarrak, baina oraindik ere lan handia dugu aurretik. Ikusten dugu mutilek baino gutxiago jotzen dutela neskek lehiaketa jardueretara, eta badira jarduera batzuk mutilek aukeratzen ez dituztenak. Hori aldatzen ari da, baina poliki”, azaltzen du Iturriotzek.

Jolas Hezi programa LH1-eko eta LH2-ko neska-mutikoei zuzenduta dago eta eskaintza dira psikomotrizitatea, oinarrizko trebeziak lantzen dituzten jarduerak, gimnasia erritmikoa… “Espero dugu oraindik ere erabat errotuta dauden zenbait eredu desegiten joatea”.

6-16 urte bitarteko neska-mutikoentzako

Iñaki Iturriotzek azaltzen du adin horretan kokatzen dutela neska-mutikoen kirol jardueraren hasiera. “Bestelako erronketarako uste dugu badagoela kirol federatua, eta bestelako ibilbide batzuk. Adin tarte honetan nolabaiteko kirol ohiturak sustatzea dugu helburu. Hortik aurrera eta behin kirol ohitura horiek errotuta, neska-mutikoek aukera dute nork bere ibilbidea aukeratzeko, izan kirol federatuan izan era errekreatiboko jardueretan. Jarduera aldetik eskaintza ahalik eta aberatsena eskaini nahi dugu hasierako urteetan poliki-poliki joan daitezen gustukoenak dituzten jardueretan espezializatzen”

Errendimendua edo formazioa

Iturriozek argi du erronka asko dituela Eskola Kirola programak. “Ez da bakarrik pertsona osasuntsuak heztea edo gizarte mailan harremanak sustatzea. Gehienbat heztea du helburu. Horregatik, Gipuzkoak Eskola Kirola programak eredu propioa du, eta ikastetxeetan kokatzen dugu ardatza”.

Pazientzia eskatzen die gurasoei eta gainerako eragileei. “Esaten digute adin horietan inguruko lurraldeetako neska-mutikoekin neurtzen garenean erraz irabazten digutela. Maila txikiagoa dugula. Baina baditugu datuak, eta datuek erakusten dute kadete mailatik aurrera gauza garela maila horietara iristeko eta baita ere hobetzeko. Gurasoei eta bestelako eragileei pazientzia eskatzen diegu. Lasai hartu behar dugu gure haurren prestakuntza. Denbora eman behar diegu beraien gaitasunak garatzeko. Denen garapena ez da berdina, beraz goazen guztiei garapen biologikoa egiteko denbora ematera, eta iritsiko da unea non emaitzei begira jarriko garen”.

Iturriotzen esanetan klubak lehen lerroko aliatuak izan behar dira Eskola Kirola programan. “Prozesuaren eta emaitzaren arteko oreka dago hemen jokoan. Uste dugu hasierako adinetan prozesuari eman behar zaiola garrantzi handiena, eta geroago iritsiko dela emaitzarekin arduratzeko unea. Adin honetan umeak gehiago daude ikasteko, besteekin harremanetan hasteko eta Eskola Kirola programak eskaintzen dituen aukerak baliatzeko. Emaitzaren pisua eta ondorioa gerorako utzi behar dela uste dugu. Klub batzuk bat egiten dute filosofia honekin eta gure ikuspegiarekin, baina egia da mundu federatuan emaitzaren pisua oraindik ere oso errotuta dagoela. Haur bat bost urterekin entrenatzen jartzeak ez gaituela inora eramaten ulertarazteko ahalegina egin behar dugu, oraindik ere”.

Elkarrizketa Goiena telebistan hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude