Quantcast
Guraso.eus

Haziaraba, txiki-txikitatik arteari lotzeko jaialdia

Berriz dator Arabara umeei arterako irrika pitzarazi nahi dien ekimena. Jolaserako proposamena, ikuskizun bat eta film labur emanaldia baliatuko ditu, horretarako, jaialdiak. Paraiso Antzerkia dago, besteak beste, antolatutako ekimenaren atzean.

Abenduan zehar Arabako hainbat herri eta kuadrillatan zehar ibiliko da Haziaraba jaialdia. 35 emanaldi izango dira ikusgai Agurainen, Amurrion, Aramaion, Legution, Iruña Okan, Bastidan, Laudion, Oionen eta Abetxukoko kontzejuan.

1 eta 6 urte arteko umeei eta haien gurasoei dago zuzenduta ekimena – Gaztefilmfest, Gutxinaka-Gutxinaka, Kalakalab eta Paraiso Antzerkiaren eskutik, Aldundiak eta udalek antolatuta–, eta seme-alaben hazkuntzan “artearen balioa bizitzeko eta lotura emozionalak eraikitzeko” aukera izan nahi du.

Helburu horrekin, hiru osagai ditu jaialdiak. Aurrenekoa, Jokoen eszenografiak instalazioa. 1 eta 4 urte arteko umeentzat da, “abentura artistiko bat, non handiek eta txikiek kartoizko eszenografia txikietan murgiltzeko aukera izango duten, barnealdea arakatzeko, eraldatzeko eta familian bizitzeko espazio berriak sortzeko”.

Bigarren da Lorategian ikuskizuna. 1 eta 4 urte artekoentzako izango da hau ere: “Emakume bat lorategian jarrita, ametsetan. Gizon bat etorri eta bidaia bat egitera gonbidatuko du, irudien munduan barrena. Bien artean arbola artean dagoen oihala jasoko dute; oihala orrialde zuri bihurtuko da, irudiak sortzeko eta aldatzeko, jolas egiteko eta emozioak azaltzeko leku bihurtuko da”.

Jaialdiaren hirugarren ekintza Iluminar animalarium izeneko zinema emanaldia da, 3 eta 6 urte arteko neska-mutikoei zuzenduta, kasu honetan. Film labur bilduma bat da, non ikusleak hainbat pertsonaia eta animaliari lagun egingo dion “espazio batetik bestera ibiltzen, egoera batetik beste batera igarotzen, misterioen bitartez”.

Antolatzaileen arabera, “animaziozko film laburren nazioarteko programa zirraragarria” da Iluminar animalarium, “haurrek beren lehen zinematografia-esperientziak” izan ditzaten prestatutakoa.

Programazio osoa hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading