Quantcast
Guraso.eus

Haurrak Ere Bai plataforma, haurren eta nerabeen eskubideen alde

Adingabeek pairatzen dituzten eskubideen urraketari erantzuna emateko, guraso talde batek ‘Haurrak Ere Bai’ plataforma sortu du. Plataforma berriak prentsaurreko telematiko batean iragarri zuenez, haurrek arazoak izaten dituzte konfinamenduan, hala nola ongizate eta osasun arazoak, elikadura arazoak eta asaldura psikologiko eta emozionalak. Eta honi aurre egiteko elkartu dira.

Maider Aizpuruak eta Miren Camisonek ‘Haurrak ere bai ‘plataforma aurkeztu zuten apirila bukaeran Irungo eta berako etxeetatik, hurrenez hurren. Plataforma horrek 55 kide aktibo eta 300 jarraitzaile inguru ditu sare sozialetan. Elkarte berriaren helburua “haur eta nerabeen eskubideak defendatzea eta horiei ahotsa ematea da, egoera larri honetan”.

Hego Euskal Herriko berrogeita hamar bat familiak osatzen duten plataformak salatu duenez, krisi honetan adingabeek “eskubideen urraketa” pairatzen dute, 50 egun baino gehiagoz “erabateko itxialdia” eta “erabateko ikusezintasuna” jasaten ari direlako, eta horrek osasun eta portaera nahasmenduak eragiten dizkielako.

Hainbat mugimendurekin elkarlanean

Hala ere, modu koordinatuan lanean ari dira hainbat mugimendutako kideekin. Batetik, ‘Oinherri’ hezitzaileen taldearekin ari dira jardunean, Euskal Herrian. Haurren ahotsa eta beharrak kontuan hartzeko eskatzeko, adierazpen bat eta bideo bat kaleratu ditu taldeak. Bestetik, Espainian sortu den ‘Coronainfancias’ mugimenduarekin ere bat egiten du plataformak.

Plataformak indartsu jarraitzen du eta gomendio sorta bat ere argitaratu zuen, haurrak kalera ateratzen hasi zirenean. Modu berean, haurrentzat komenigarria den guztia defendatzeko lanean jarraituko dutela iragarri zuten. «Egoera honi aurre egiteko batu gara, baina asmoa da gure umeen eskubideen alde lanean jarraitzea. Batu nahi duena sare sozialetatik batu daiteke», azaldu zuen Aizpuruak.


Argazkiaren iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading