Quantcast
Guraso.eus

Harremanak – Eraikuntzaz eta desikasketaz

Harreman mota ezberdinak. Giza harremanak, naturarekiko harremanak, hizkuntzekiko harremanak… Botere harremanak, harreman hierarkikoak, berdinen arteko harremanak, axolagabetasun harremanak…. Harreman anitzak.

Ohartzen al gara gure inguruan osatzen eta sortzen ditugun harreman ezberdin eta ugariez? Ekartzen al ditugu gurera? Nolako harremanak eraiki nahi ditugun erabaki aurretik, begiratzen al diogu modu ireki batean, aurrean dugun horri, nahiz gizakia, nahiz hizkuntza, nahiz natura…izan?

Mestizaje hutsa gara, eta sortzen ditugun harreman ereduak ere halakoak dira; gizartetik eta ingurutik xurgatzen duguna norbere iragazkitik pasatako eraikuntzak gara. Harremanetan egoera mingarriak ematen direnean, deseraikuntza prozesuak martxan jartzea aukera zail eta polit bat da. Zaila diogu ekintza horrek egoerak modu kritiko batean begiratzera behartzen gaituelako, kasu askotan gure “miseriak” astinduz eta gizartearen normalizazioari aurre egiten. Polita dela diogu harreman mota jariotsu eta osasuntsuak sortzeko aukerak irekitzen dituelako.

Erlazioak zer-nola osatu nahi ditugun jakiteko eta gure harremanak identifikatu eta bizitzeko besoak, begiak, belarriak… irekitzea bezalakorik ez dago. Zabaltzeak, esperimentatzeko aukera ematen digu; bizipenak, sentsazioak izateko parada, eta ondorioz, erabakiak modu kontziente batean hartzeko bideak irekitzen dizkigu. Bide anitz hauek bidezidor ere izan daitezke, zuzenak, bihurgune askorekin, bukaerarik gabekoak edo eta hasi eta berehala bukatzen diren horietakoak. Tarteka min ere eman diezagukete edo deseroso sentiarazi, baina adi egonez gero eraikuntza kolektibo baten parte direla ohartuko gara. Harremanak ez baitira norberarenak soilik, komunitate edo bakoitzaren gertuko eta urruneko eremuarenak baizik.

Harremanak bizitzean konturatzen al gara zer dela eta gauden batzuetan/batzuekin otzan edo menpeko edo-eta beste batzuetan/batzuekin boteretsu eta mokoharro? Harremanek zergati eta oinarri bat izan ohi dute, ez dira ezerezetik sortuak izaten. Jaioterriak, bizipenak, sentsazioak, esperientziak… eragina dute. Harremanen eraikuntza honetan ez baita berdina poliedroaren ertz batetik begiratzea edo bestetik bizitzea.

Hemen duzue gaiari buruz hitz egin, hausnartu eta jolasteko Haziakeko kideok sortu dugun kolore mataza deitu diogun errealitate areagotuko aplikazio xume bat.

Dokumentu honetan hainbat egoera dituzue eta “Kolore mataza” APParen bitartez irudi bakoitzaren beste errealitate bat ikusiko duzue. Aplikazioa Android 4.1 bertsiotik gorakoentzat da erabilgarria. Azalpen gehiagorako klik egin hemen.

 

CC by-Sa Haziak- Nekane Martiarena, Nora Barroso

Nora Barroso Nekane Martiarena

Haziak, disziplina eta entitate anitzeko egitasmoa da, gizarteko partaideen arteko elkarbizitzan harreman desorekatuak eta botere harremanak iraultzea du helburu. Elkar bizitza osasuntsua elikatzeko asmoz barne eraikuntzan zein kontzientzia kolektiboan oinarritutako metodologia bat garatu da. Bertan, hezkuntza formala, hezkuntza ez formala eta herritarren arteko zubiak eraikitzen dira. Haurrak ezinbesteko hartzailetzat dituen egitasmo honetan, metodologia eta material zehatza landu dute hainbat eragilek elkarlanean. Laborategi erraldoian tokian tokiko sustraiak ezarriz borobiltzen, osatzen, handitzen, indartzen joango den egitasmo bizia da Haziak; euskalduna, partehartzailea, parekidea, haurren ahotsa kontuan hartzen duena, ekarpenei irekia, errespetuan oinarritua… Lehen esperimentazio esparrua Oiartzun herrian kokatzen da. Aurrera begira Euskal Herriko nahi adina herri eta eskoletan antzerako lanketak egiteko oinarriak ezarri nahi ditu, beti ere ekarpenei irekia egonik.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading