Quantcast
Guraso.eus

Hamasei astera arteko aitatasun-baimena

Astebete barru, azaroaren 1are-kin batera sartuko da indarrean aitatasun-baimenari dagokion neurri berria. Egun, zortzi asteko baimenaz gozatzeko aukera dute seme-alabaren bat izan dutenek, baina azarotik aurrera jaiotzen diren haurren aitek denbora bikoitza izango dute iritsi berriaren zaintzari eskaintzeko –hala nahi izanez gero–.

Gizarte Segurantzak ordaintzen dizkie zortzi aste horiek aitei, eta beraz, neurri berria indarrean sartzean Eusko Jaurlaritzak bere gain hartuko du aitaren soldataren ordainketa; luzapeneko zortzi asteetan soldataren %100 ordainduko zaio.

Neurri berriari esker, guraso biek, amak eta aitak, baimen bera izango dute denborari dagokionez; hamasei aste bakoitzak. Hala eta guztiz ere, neurri berriarekin ez da derrigorrezkoa izango baimena zortzi astez luzatzea, gutxiago eskatzea ere posible izango delako.

Gurasoek, bestalde, ezin izango dute biek batera baimenaz gozatu; lanera joan behar ez duenak jaioberriaren zaintzak bere gain hartuko dituela ziurtatzeko neurria da hau.

Bestalde, denbora tarte ezberdinetan, tartekatuta, hartu ahal izango da baimena, ez baita derrigorrezkoa izango zortzi asteak jarraian eskatzea. Edonola ere, seme edo alabak urtebete egin arteko tartean agortu ahal izango dira eskatutako asteak; ez, ordea, haurrak urtebete egin eta gerora.

Euskal Autonomia Erkidegoa izango da neurria aldatzen lehena; Madrilen, esaterako, aitek gehienez 12 aste hartu ahal izango dituzte urtarriletik aurrera Eusko Jaurlaritzak urtebete darama familiak laguntzeko asmoarekin neurri berria garatzen, eta asteon onartu du, az-kenean, aitatasun-baimenaren luzapena.

Neurri hau posible egiteko, 25 milioi euro bideratu ditu Eusko Jaurlaritzak.

Bete beharrekoak

Aitatasun-baimena gehienez ere hamasei astera arte luzatzeko baldintza zehatz batzuk bete beharko dira. Esaterako, haurra haurtzaindegira eramaten dutenek ezin izango dute aitatasun-baimena luzatu.

Horretaz gain, bikotekidearen lan jardunak ere izango du zeresanik. Izan ere, bikotekidea jardun erdira lanean dutenek ere ezin izango dute baimena luzatu.

Autonomoki lan egiten dutenen kasuak ere berezitasunak izango ditu; autonomoak baimena hartu dezan, beste pertsona bat kontratatu behar izango du bere lana betetzeko, berak haurraren zaintzaz arduratzeko baimena hartu dezan.

Azkenik, etxeko langilea duten familiek posible izango dute hamasei asteko baimena hartzea: ez da oztopo izango etxerako lanetarako norbait kontratatua izatea. Halere, funtzionarioek ez dituzte aipatutako baldintzak bete beharko, irailaren 1az geroztik ari baitira baimen osoaz gozatzen.

Baldintzak zeintzuk diren ezagutzea garrantzitsua da; izan ere, umea izateko dauden hainbat familiatan uste dute ez dela hain erraza guztiak betetzea. Berdintasunerako bidean neurri garrantzitsua dela uste dutenak ere badaude.

Nola eskatu

Azaroaren 1etik aurrera jaioko direnen aitek eskatu ahal izango dute hamasei asteko baimena, egun horretatik aurrera. Informazioa zein laguntzak Zuzenean bulegoetan eskatu ahal izango dira –Donostiako Andia kalean–, edota www.euskadi.eus/familia webgunean.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading