Quantcast
Guraso.eus

Fruta batzuk aliatu onak dira hortzeria zaintzen laguntzeko

Marrubia, kiwia, ananasa, sagarra, angurria, meloia eta melokotoia nabarmentzen dituzte odontologoek. Hori bai, garrantzitsua da jaten dugun aldiro hortzak ondo garbitzea. Txikitatik ikasten den gauza bat da, gainera.

Ondo zaindu behar dira hortzak, eta jakinekoa da elikadura ohiturek ere badutela eragina. Fruta kontsumoa kontuan hartuta badira gure hortzeriarentzako osasungarriagoak diren frutak. Dituzten bitaminen eta azidotasun mailaren arabera garbiketa funtzioa egiten dute, eta horrekin batera hortzak indartzen dituzte.

Hortzak eta hortzoiak digestio aparatuaren zati garrantzitsua dira. Organismoak duen lehen hesia da, eta ez du aparteko babesik. Ahotik sartzen dira elikagaiak gorputzera. Bertan sortzen da listua eta mamurtzen ditugu elikagaiak.

Hortzen osasuna, beraz, funtsezkoa da elikadura onerako; izan ere, ganoraz eta hortzetako arazorik gabe murtxikatzea garrantzitsua da. Arazoak sortzen badira digestioa zailtzen da. Nutrizio adituek gomendatzen dute mokadu bakoitza 40 aldiz murtxikatzeko eta odontologoek otordu guztien ostean hortzak garbitzeko.

Fruta kontsumitzea lagungarria izan daiteke hortzen zainketa egokirako. Umearen adinaren arabera hasiko gara fruta batzuk edo besteak eskaintze, birrinduta edo zatika kasuan kasu.

Eta bai, fruta batzuk hortzen zainketan laguntzen duten ezaugarri bereziak dituzte. Mesedegarriagoak dira, hortaz, funtzio horretarako. Argi eduki behar da, baina, ez dutela inolaz ere hortzak garbitzeko beharra ordezkatzen.

Marrubia

Hortzen osasuna zaintzeko fruta ezin hobea da marrubia. Arrazoi nagusia da xylitol ugari duela. Polialkohola da, eta hortzen desmineralizazioa zein esmaltearen higadura galarazten ditu. Esan daiteke, beraz, marrubiek hortzetako esmaltea indartzen laguntzen dutela. Onak dira baita ere hortzoietako odol-zirkulazioa bizkortzeko modu horretan osasungarri mantenduz.

Kiwia

C bitamina maila handiak ditu kiwiak, eta aliatu egokia da hortzoien osasunerako; izan ere, hortzoiak inguratzen dituen ehunaren kolagenoa indartzen du. Onuragarria da periodontitis arazoak saihesteko. Gainera, gure immunologia sistema zaintzen duen fruta da, eta horrek badu zerikusia ahoko osasunarekin.

Ananasa

Ananas fruta kontsumitzen da, besteak beste, lagungarria delako likidoen erretentzioa saihesteko eta C eta B bitamina asko duelako. Askok eta askok ez dakitena da ananas frutak duen bromelina oso ona dela hortzak zuriago eta garbiago mantentzeko. Bromelina hortzetako hainbat orban kentzeko gauza den entzima bat da. Era berean, oso eraginkorra da plakari aurre egiteko.

Sagarra

Kontrako ustea badago ere hortzak garbitu egin behar dira sagarra jan ostean ere. Egia da, dena den, fruta perfektua dela hortz-haginen zainketarako. Bere testura kurruskaria oso egokia da hortzen garbiketarako. Gainera, plakaren pilaketa saihesten du sagarrak eta hortzoiak osasuntsu mantentzen ditu.

Angurria eta meloia

%90 ura dira eta listua sortzen laguntzen dutenez zaildu egiten dute bakterioak hortzetan pilatzea. A eta C bitamina ugari dute eta baita ere potasioa. Meloiaren azido folikoa, bestalde, oso ona da ahoko ultzeren prebentziorako.

Melokotoia

Ahoko osasunerako onuragarriak diren bitamina asko ditu. A bitamina ona da txantxarren prebentziorako, C eta K bitaminek hortzoietako odol-jarioak saihesten laguntzen dute, eta D bitamina ona da hortzak zein esmaltea indartzeko.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading