Lakuako Hezkuntza Saila eta EiTBk datorren astelehenetik (martxoak 30) aurrera «Bitartean, Etxetik Ikasten» irakaskuntza saio berria martxan jarriko dute. Goizero, 9.00etatik 12.00etara, etxean euskarri teknologikorik ez duten ikasleei hezkuntza prozesua errazten lagunduko dien programa eskainiko du ETB3 katearen bitartez.

Era berean, Hezkuntza Sailaren zein EiTBren asmoa «Bitartean, Etxetik Ikasten» saioa interaktibo bihurtzea da. Era horretan, ikasleek euren galderak, zalantzak edo iradokizunak luzatu ahal izango dituzte, eta hauen erantzunak programan zehar edo hurrengo emankizunetan eman ahal izango dira.

“Bitartean, Etxetik ikasten” saioa. Argazkia: Eitb.eus

Atalak eta gaiak

Egunero, “Bitartean, Etxetik Ikasten” saioa Aldaba izeneko tartearekin irekiko da. Irakasleak etxeetatik jasotako feedbacka partekatzeko unea izango da: jasotako argazkiak, audioak, kezkak eta galderak erakusteko momentua. Programan ikasleen interakzioa bilatu nahi da. Horretarako, irakasleek haurrei gonbidapena egingo diete beraien galderak bidaltzeko, eta hurrengo saioetan galdera horiei erantzungo zaie.

Orobat, egunean hiru orduko eskola hauetan denetariko gaiak jorratu dira, hainbat ataletan banatuta.

Esaterako, Irakurketarekin goxatzen atalean, egunero, ordu laurden bat eskainiko diote irakurketaren ulermenari, testu ezberdinak oinarri hartuta.

Euskararen gaia Hitzak jolasean tartean landuko da. Ahozkotasunak izango du lehentasuna (hitz-jokoak, aho-korapiloak, ikerketa proposamenak, errezetak, komikiak, ipuinak, bitxikeriak…), idatzizko adierazpena ahaztu gabe.

Mugi-mugi atalak itxialdian gauden bitartean gorputza lantzeko ariketak proposatuko ditu.

Hari-mataza tartean, berriz, matematikaren txanda izango da: buruketak, mahai-jolasak, jolas matematikoak, matematikaren eragina egunerokotasunean, buruzko kalkulurako estrategiak, abakoen erabilera, bitxikeria matematikoak, eragiketak egiteko estrategiak…

English corner izenekoan, ingelesaren irakaskuntzara hurbilduko ditu ikus-entzule gazteak (errutina, hiztegia, irakurketa, olerkiak, marrazki bizidunak eta albiste laburrak), betiere ikusteko euskarriaz lagunduta.

Gizarte Zientziak landuko dira Munduaren birak atalean, eta bertan zuhaitz genealogikoaz eta norberaren bizitzaren kronogramaz jardungo dute, besteak beste.

Zientzia edonon sailak, aldiz, metodo zientifikoaren erabilera egunerokotasunean eta esperimentazioa jorratuko ditu, eta, oro har, zientziari buruzko dokumentalak ere erakutsiko dira. Teknologia konpetentziari eskainitako denboran, modu errazean, jolasen bidez eraikitzea sustatuko da.

Musikak izango du, berebat, bere lekua. Ttakun-ttakun atalean, musika-adierazpena, dantzak, perkusio jolasak eta erritmoak landuko dira.

Eta azkenik, Bitakorak egingo du egunaren itxiera, zer ikasi den errepasatzeko eta ikusleak gune interaktiboan parte hartzera gonbidatzeko.

Hori guztia ETB3n eta eitb.eus-en eskaintzeaz gain, Hiru3ko euskarri digitaletan ere jasoko da ondoren (webgunean, APPan, HBBTV eta Smart TV zerbitzuetan).