Atzo Nahia Alkortak (Sabeletik Mundura) atzo argitaratutako testua ekarri dugu guraso.eus era.

Eguerdi on,

Gaur atzo baina hobeto edo okerrago?  Atzoko buletinaren ondoren erantzun dexente jaso ditut eskerrak ematen… eta eskerrak zuei, irakurtzeko denbora hartu eta erantzuteko tartea ere eskaintzeagatik. 

Zuen mezuak irakurrita hitz batek hartu dit burua gehien bat….

ESPEKTATIBAK…

Espektatibek egunerokoan duten zama eta pisuak egiten digun kaltearen kontrola galduta duen jendartean bizi gara, eta orain, etxean sartuta egon behar honetan zama hori gehiegizkoa da motxilan… 

Lanean X izan beharra, ama, guraso edo hezitzaile bezala Y izan beharra, emakume bezala Z izan beharra, bikotekide bezala J, lagun bezala O, alaba bezala T… eta beste zenbait jantzi egunerokoan superheroien abiaduran aldatzeko gaitasunarekin XYZJOT eta beste hizki guztiak gure baitan izateko gaitasuna bat-batean, gu geu, gure mamu eta arantza guztiekin soilik eta beste pertsona batzuen mamu eta arantzak alboan izateko egoera behartuan topatzea ez da makala. 

ESPEKTATIBAK eraiki ditugu abiadura izugarrian etxean egin beharko genukeen guztiaren inguruan. 

  • Etxea sakon garbitzeko aprobetxatuko dut.
  • Etxean egiteko zeuden gauzatxoak egiteko aprobetxatuko dut.
  • Marie Kondoren arauak aplikatuko ditut.
  • Haurrekin 200 eskulan eta ekintza didaktiko egingo ditut. 
  • Leihoan ostadarra jarriko dut bizilagunak alaitzeko. 
  • 5 liburu irakurriko ditut. 
  • Haurren irakaslea izango naiz eskola ez duten bitartean.
  • Laneko eguneroko gauzez gain beste 2000 aurreratuko ditut. 
  • Bikotearekin hitz egiteko aprobetxatuko dut. 
  • 500 errezeta berri eta goxo egingo ditut. 
  • Larrua jotzeko denbora aterako dut.
  • …

Eta egunak badoaz, poliki-poliki, baina badoaz aurrera eta zerrendako ezer egin ez duzunaren zama gainera datorkizu… 

Ez. 

Benetan ez duzu zerrenda osoa bete beharrik. 

Egokitzapen aldian gaude, gainera, datorkigunaren informazio argirik gabe… zenbat iraungo du honek? lanera noiz arte joan beharko naiz? lanetik bidaliko naute? kobratuko dut? zergak ordaindu beharko ditut? noiz itzuliko dira umeak eskolara? dudan burukomin hau koronabirusa da? nola daude maite ditudanak?… estres ikaragarria. 

Estres hori ahal den neurrian lasaitzearekin nahikoa lan. 

Aldatu espektatibak. 

Gaur egingo dut, gaur egin dezakedana, derrigor egin behar dudana eta egiteko gogoa dudana. 

Eta gainera hori guztia baldintzatuko dute etxean nirekin egon behar dutenen beharrek. 

Gaur egingo dut, gaurko nire mamuek eta zamek uzten didatena… 

Eta gainera… gozatzen saiatuko naiz. 

Animatuko zara saiatzera