Quantcast
Guraso.eus

Erloju biologikoa aurrera doa gizonentzat ere

Gaztezulo aldizkaritik ekarri dugu ondoko artikulu hau.

Haurrak izateko unea atzeratzearen arrisku eta zailtasunek berdin eragiten die bi sexuei; gizonen kasuan, umearen osasunarekin zuzenean erlazionatuta dago beren adina.

Gure biologiak ez du gizartearen erritmora egokitzeko astirik izan; horregatik, haurrak izateko erabakia geroz eta gehiago atzeratzen dugun bitartean, emankortasun arazoak eta gaixotasun genetikoak garatzeko jaioberrien aukerak biderkatu egin dira azken urteetan. Dena den, orain arte erloju biologikoaren tik-tak beldurgarria soilik emakumeen kontua zela uste bazen ere, gizonen adinak garrantzi bera du ugalkortasun zein haurraren osasunaren baitan.

Hala, egun osasun ikerlariek dudarik ez dute emankortasunak jaitsiera nabarmena duela 35-37 urteetatik aurrera, bai emakueengan eta baita gizonengan ere. Gizonen kasuan, gainera, fisikoki gogorrak diren lan jardunek edota kirol gehiegi egiteak zailtasunak eragin ditzake haurdunaldia lortzeko saiakeran. 

Antza denez, gizonak ez dira erabat antzuak bilakatzen, ez baitute emakumeen antzera menopausiarik, baina adin horretatik aurrera beren emankortasuna nabarmen jaisten da. Hala, emankortasunaren indiziea estuki lotuta dago zahartze prozesuarekin. Egun, gizon gehienek 35-40 urte bitarte izaten dute beren lehen seme-alaba, baina orain arte hori ez da haientzat estigma izan; aldiz, emakumeentzat bai. Halere, gizonek aitatasuna atzeratzearen arrazoiak berdinak dira; lanpostu egonkorra izatea, denbora gehiago hartzeko aukera, etxebizitza…

Gizonen adina, haurraren osasunarekin zuzenean lotuta

Zoritxarrez, gizonen adinak eragin zuzena du haur jaioberriaren osasunean; hala, azken ikerketen arabera, jaioberriak gaixotasun genetikoak garatzeko arrisku handiagoa du aita heldua bada. Horrekin batera, haurdunaldian eta erditzean ere arazoak egoteko aukerak biderkatzen ditu aitaren adinak; haurdunaldiko diabetesa edota erditze goiztiarra eragin ditzake, besteak beste. Hala, haurdunaldi berandutiarren arriskuak ez dira soilik emakumeen kontua, duela gutxira arte uste izan den moduan.

Gizon eta emakumeen arteko alde nabarmenena mutazio genetikoen proportzioak dira. Hain zuzen, Nature aldizkariak argitaratutako ikerketa baten arabera, adinarekin emakumeen mutazioak %0,7 handitzen dira, eta gizonenak aldiz, %1,5.

Albistearen Iturria

Ane Urrutikoetxea

Utzi erantzuna

Zure e-posta helbidea ez da argitaratuko. Beharrezko eremuak * markatuta daude