Quantcast
Guraso.eus

Elikadura-piramidea Haurren Ikus-entzunezkoen Kontsumorako

Artikuluaren izenburua zuzenean hartu dut Wired aldizkariak Maiatzean publikatutakotik “A Food Pyramid for Kids’ Media Consumption”. Bertan, ikertzaile norbanako eta ikertzaile talde estatubatuar ezberdinek emandako kontsumo digitalerako gomendioak piramide formatuan eta lau kategoriatan laburtu dituzte:

Salbuespenekoak: telebista oheratu aurretik ikustea, telebista piztuta edukitzea nahiz eta kasu ez egin, pantailak jatorduetan.
Noizean-behinkakoak: Youtube, lehenengo-pertsonako shooter bideo-jokoak, sare-sozialak.
Neurrian erabiltzekoak: ebook interaktiboak, telebista/pelikulak, telebista/bideo interaktiboak, bideo-joko aktiboak.
Erabilera askekoak: familiarekin bideo-txatak, PBS (telebista publikoa amerikarreko Sesam Street bezalako saioak) gurasoekin ikustea, zaletasun taldeak/foroak, musika/audio-liburuak/podcastak

Irudia: Wired

Salbuespenekoetan, lokartzean eta familiarekin interakzioetan eragin negatibo argia duten erabilpenak daude eta aske erabiltzea aholkatzen diren horietan justu aurkakoak: familiarekin hartu emana handitu dezaketenak. Azpimarratzekoa da ere, artikuluak audio edukiak hobesten dituela mugagabe, eduki bisualen aldean, izan musika, audio-liburuak edo podcastak.

Gomendagarriagoak dira, artikulu honen ustez, interaktiboagoak diren formatuak, horrela, Youtube-koak (nahiz eta autoplay aukera kendu eta edukia mugatu) bere horretan ez dira bideo-interaktiboak (adib. dantzara animatzen duten bideoak) bezain egokiak. Bideo-jokotan ere lehen-pertsonakoak eta aktiboak (errealitate birtualekoak edo Wii/Kinect kontsoletakoak) alderatu eta mugikortasuna hobesten dute adituek.

Duela 50 urte asmatu zirenetik, elikadura piramideekin gertatu bezala, sortuko du eztabaida gaiak eta eguneratuko dira kontsumo teknologia berriek (adib., errealitate birtualak) luzetara erakutsiko dituzten emaitzekin, baina piramide formatuak eman dezake aholkuak era erraz batean transmititzeko aukera. Lokalizatu beharko dira gomendioak ere herrialde bakoitzera, hots, Euskal Herrian ETB3 familian ikustea gomendatuko genezake (Sesam street-en ordez) edo Ene Kantak-eko bideoak aktiboki dantzarazi dezaketelako.

Edonola, eta artikuluan esplizituki agertzen ez bada ere, piramide ororen oinarrian behar dute: jostailu tradizionalek, liburuek, kantuak, dantzak, kirolak, eta abar luzeek. Kontsumo digitala saihestezina bada ere, piramideak ezin direlako hondar lausoetan altxatu.

Mikel Azkarate

"Mikel Azkarate-askatsua Blazquez Bergara, 1984. Zibergara taldeko kidea. Teknoptimista. Anen aitatxo."

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

Gune honek Akismet erabiltzen du zaborra murrizteko. Ikusi nola prozesatzen diren zure erantzunen datuak.

loading