Quantcast
Guraso.eus

Daniel Goleman: “Distrazio teknologikoz betetako mundu honetan garrantzitsua da umeekin arretarako gaitasuna lantzea”

Psikologoa eta kazetaria da Daniel Goleman, eta espezialista adimen emozionalarekin lotutako gaietan. Azpimarratzen du oso garrantzitsua dela neska-mutikoekin kontzentrazio ariketak egitea.

“Emozioen kudeaketan oinarritzen da gehienbat adimentsua edo azkarra izateko gaitasuna. Garrantzitsua da zer eta zergatik sentitzen dugun ulertzea, eta horrekin batera ulertzea zer sentitzen duten besteek. Oso lagungarria da harreman pertsonaletan eta ondorioz baita ere norberaren zoriontasunerako”.

Adituak dio haur batentzat adimen-kozientea baino erabakigarriagoa dela kontzentratzeko duen gaitasuna. “Distrazio teknologikoz beteta dagoen mundu honetan oso garrantzitsua da umeak gai izatea atentzioa non jarri nahi duten erabakitzeko; izan ere, kontzentrazioa da edozein ikasketa prozesuren oinarria. Ikastetxe guztietan erakutsi beharko lukete kontzentratzen”.

Adimenak arreta galtzen du

Golemanek azaltzen du etengabe gertatzen dela adimenak arreta galtzea. Normala dela eta handitzen joaten garen heinean ikasten dugula berriro ere zentratzen. “Orain mindfulness esaten diegu gaitasun hori garatzeko teknikei. Oinarrian da arreta galtzen duzunean horretaz jabetzea eta berriz ere kontzentratzea. Ariketa horiek laguntzen dute neurona zirkuituak indartzen. Arreta galdu duzula ohartu eta berriz ere kontzentratzen zaren aldiro ari zara zure kontzentrazio sistema sendotzen. Gimnasiora joatea bezala da”.

Garunak arrera jartzen ikasi nahi duela dio Golemanek, eta edozein ikasketa prozesuren oinarrian dagoela gaitasun hori garatzea.

Meditazioa

Meditazioa erabateko kontzentrazioa da eta ikerketek diote jarduera hori egiten dutenek emaitza akademiko hobeak lortzen dituztela. “Zientzian kontrol kognitiboa esaten diote. Distrazioak alde batera utzi eta zuk aukeratutako horretan kontzentratzeko gaitasuna da. Garunak kontrol sistema berdina erabiltzen du emozio desatseginak kudeatzeko”, dio Golemanek.

Kontrol kognitiboarekin lotutako esperimentu ezagunetako bat Marshmallow izenekoa da, eta Stanford unibertsitatean egin zuten. “Banaka-banaka umeak gela batean sartzen dira eta bertan gozoki handi eta erakargarri bat ikusten dute. Gidari bat dago eta umearen aurrean uzten du gozokia esanez berehala jan dezakeela, baina bera itzuli arte itxaroten badu bi jasoko dituela. Eta badoa. Umeen heren batek berehala jaten du gozokia, eta gainerakoek itxaron egiten dute. 30 urte beranduago lokalizatzen dituzte pertsona horiek berriz, unibertsitatean sartzeko adina dutenean. Unibertsitatean sartzeko azterketa 600 puntukoa bada, itxaron zutenek bataz beste 210 puntu gehiago ateratzen dituzte itxaron ez zutenek baino. Beste modu batera esanda, hobeto ikasten dute”.

Zeelanda Berrian egindako beste esperimentu baten berri ere ematen du Golemanek. “Kontrol kognitiboaren inguruko beste azterketa horretan ondorioztatu zuten kontzentraziorako gaitasun mailak eragin handiagoa duela pertsonen garapen intelektualean koziente intelektualak edo familiaren maila ekonomikoak baino”.

Argazkiaren iturria hemen.

Albistearen iturria hemen. (gazteleraz)

 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading