Quantcast
Guraso.eus

Bronkiolitisa, txikien neguko epidemia

Bronkiolitisa bi urte baino gutxiagoko haurrek izaten duten arnas infekzioa da. Infekzio horrek bronkioen azken atalari eragiten die; bronkioloei. Hainbat motatako birusek sor dezakete. Hala ere, arnas birus sintzitialak (ABS) eragiten dute kasu gehienetan.

Birus horrek urte osoan zirkulatzen du, baina bereziki urritik martxora. Horregatik, bronkiolitis kasuak urte osoan ikusten ditugun arren gehienak udazkenean eta neguan gertatzen dira. Epidemiak izaten dira; txikienen epidemia da.

Sintomak

Bronkiolitisak, hasieran, edozein katarroren sintoma berak ditu: mukiak, eztula, sukarra… Bi edo lau egunen ostean bronkioloak kaltetzen dituenean haurrari batzuetan arnastea kostatzen zaiola nabaritu dezakegu. Azkarrago arnasten du, saihets-hezurrak nabarmentzen zaizkio arnas egiterakoan, arnastean abdomena mugitzen duela ikusiko dugu, eta batzuetan haurraren bularrean txistu hotsak entzuten dira.

Haurrak jateko zailtasunak ditu, nekatu egiten da eta hartualdiak banatuagoak eta laburragoak izaten dira. Sintoma horiek aste bat edo bi irauten dute, baina eztulak batzuetan luzaroago irauten du. Lau aste ere iraun dezake.

Infekzioa da, beraz, kutsakorra

Esan moduan infekzio bat da, eta beraz, kutsatu egiten da. Kutsatuta dagoen haur edo heldu baten listuaren edo mukien bidez kutsa daiteke edo eskuen bidez, esaterako. Birusa zazpi ordu iraun dezake bizirik gorputzetik kanpora, eta eztularen, doministikuen, eskuen eta objektuen bidez kutsa daiteke.

Haur zaharragoek eta helduek ere arnas birus sintzitialak eragindako infekzioak izan ditzaketela ere jakitea oso garrantzitsua da. Komeni da jakitea baita ere katarro hori arina eta sintoma gutxikoa izanda ere haurra kutsatu eta bronkiolitisa eragin diezaiokeela.

Prebentzio neurriak

Bronkiolitisa ez kutsatzeko neurrietako bat da urte osoan eta bereziki garai epidemikoan hotzeria duten haur zaharragoekin edo helduekin kontakturik ez izatea; izan ere, hotzeria arina izan arren birusaren infekzio foku izan daiteke, eta haurrari bronkiolitisa eragin diezaioke.

Beste prebentzio neurri garrantzitsuenetariko bat eskuak ondo garbitzea da. Eskuak arnas birus sintzitialak transmititzeko foku nagusia dira. Eztula edo doministiku egiten dugunean, mukiak kentzen ditugunean edo beste haur bati sudurra garbitzen diogunean birusa gure eskuetara igarotzen da, eta gure eskuetatik beste haur batengana, beste heldu batengana edo objektu batera. Era horretan birusa zabaltzeko eta kutsatzeko aukerak areagotzen ditugu. Horregatik, eskuak garbitzea ezinbestekoa da. Baita ere, batzuetan, gel hidroalkoolikoa erabilitzea ere.

Horrekin batera interesgarria da haurrei eskuen higienea erakusterakoan besaurrea edo ukondoa erabiltzeko esatea. Eztula egitean eskuak jarri ordez besaurrea edo ukondoa jarri behar dutela jakinaraztea, alegia. Horrela birusa kantitate txikiagoan iritsiko da eskuetara.

Haur bati bronkiolitisa diagnostikatzen zaionean ez da haurtzaindegira eraman behar gainerako haurrentzako kutsadura foku izan daitekeelako.

Azkenik, gogoan izan behar da tabakoak haurren arnasbideen garapenean eragin handia duenez erabat saihestu behar dela. Bronkiolitisaren kasuan, gainera, sintomak izugarri okertu daitezke.

Gomendio hauek lehen mailako arretako pediatra Marta Montejok eman ditu hemen.

Argazkiaren iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading