Quantcast
Guraso.eus

Zazpi hilabetetan, 64 amaren 200 dohaintza jaso ditu ama esnearen bankuak

2017ko urria ezkero martxan da Euskal Autonomia Erkidegoko lehenengo ama-esne bankua, Galdakaoko Ospitaleko Transfusio eta Giza Ehunen Euskal Zentroan. Euren seme-alabei bularra ematen dieten emakumeek dohaintzan emandako esnea jasotzen dute bankuan, eta, prozesatu ostean, beharra duenari banatzen diote, Osakidetzaren bidez. Kalitate bermatua duen ama-esnea analizatzen eta prestatzen espezializatuta dago, ospitaleratuta dauden eta euren amek bularra eman ezin dieten haurrek hartu ahal izateko.

 

 

 

 

 

 

 

Maiatzean Osakidetzak emandako datuen arabera, Euskadiko Ama Esnearen Bankuak, 2017ko urriaren 16an martxan jarri zenetik, 64 amaren 200 dohaintza jaso ditu, 160 litro inguru. Bankuak EAE osoari ematen dio zerbitzua, neonatologia zerbitzua duten ospitaleetan –Txagorritxu, Gurutzeta, Basurtu eta Donostia–.

Bestalde, Esne Bankuaren aurreneko zazpi hilabete horietan, dohaintzan emandako 62,32 litro hornitu dira, eta litro horiekin, guztira, 700 biberoi inguru prestatu dira. “Osasuntsu dagoen eta bizimodu osasungarria egiten duen edozein emakumek bere haurtxoari zailtasunik gabe bularra ematen ari bazaio eta aurreko hiru aste eta sei hilabete bitartean ama izan bada eman dezake esnea. Dohaintza eskuzabaltasunez egiten da, anonimotasunez, borondatez eta modu altruistan. Hau da, ez da inolako irabazi ekonomikorik lortzen”, diote Euskadiko Ama Esnearen Bankuko arduradunek.

Dohaintzan emandako esnea haur goiztiarrei edota pisu txikia edo gaixotasun jakin batzuk dituztenei eta euren amek bularra eman ezin dietenei banatzen zaie. Dohaintzan emandako esnea –prozesatu ondoren eta segurtasun-berme osoarekin– neonatologiako unitateetan ematen da, mediku taldearen aginduz eta modu anonimoan. Dohaintzan esnea emateko Ama Esnearen Euskal Bankuarekin helbide elektroniko bidez edo telefono bidez jarri daiteke harremanetan, edota pediatrari, erizainari edo emaginari zuzenean galdetuta. Esne bankuan hitzordua ematen dute ostean, eta bizimodu-ohiturei eta aurrekari medikoei buruzko galde-sorta labur bat erantzun behar izaten da. Bisita horretan bertan odola aterako diote boluntarioari, gaixotasun transmitigarririk ez daukala egiaztatzeko.

Behin zure haurtxoa elikatutakoan, esnea aterako duzu ontziak betetzeko; gero, ontzi horiek izozkailuan gordeko dituzu, eta esnea ateratako egunetik 15 egun igaro baino lehen entregatu beharko dituzu. Gainera, harremanetarako profesionalak izango dituzu: behar duzun informazio guztia emango dizute, material guztia emango dizute inolako kosturik gabe, eta sortzen zaizun edozein zalantza argitzen lagunduko dizute.

Emaile izateko 944 57 93 75 Euskadiko Ama Esne Bankua: astelehenetik ostiralera,
08:00etatik 15:00etara, Galdakaoko ospitalean. Bestela: bancodelecheeuskadi@osakidetza.eus

Albistearen iturria Puntua aldizkaria

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading