Quantcast
Guraso.eus

Yogaren onurak haurtzaroan

 

Helduek hoberena nahi izaten dugu gure seme alabentzako, ez gara ohartzen ordea, haurrak gure isla besterik ez direla. Hainbeste saiatu ordez, izaten utzi eta haien ikasle izan gintezke. Nola? Beraien ondoan gaudela sentituz. Baina ez dugu astirik horretarako. Ez dugu astirik ezta gure buruarekin egoteko ere. Denboraren kontzeptuak harrapatu gaitu. Ahal dugun guztia egiten saiatu eta ez da nahikoa.

Gure irakasleek, guraso eta beste hainbat erreferentek ere ahal zuten moduan edo ikasi zuten moduan egin zuten gurekin ere. Mendez mende ikasitakoak transmititzen jarraitzen dugu saiatze horretan, konturatu gabe ere. Baina zerbait aldatu nahi badugu, guregandik hasi gaitezke.

Guk jaso genuena ezin dugu aldatu, baina bai beste hezkuntza eredu berri bat emateko aukera sortu. Haurrak orri zuri distiratsuz osatutako liburuak bezala dira eta beraien gaitasun guztiekin liburu amaigabe bat bete ahal izango lukete. Izaten uzten badiegu, beren beharrak zeintzuk diren jakingo dugu.

Yogak haur bati bere sena errespetatzen irakasten dio. Haur batek berezkoa sentitzen du bere barruko mundua eta bere buruarekin egoten badaki, baina gaur egungo bizitzaren antolamenduak, gaitasun horiek lapurtzen dizkio pixkanaka. Eta bat batean bere altxorrik preziatuena galdu duela konturatzerako, beranduegi! edo heldua da.

Horregatik helduok badugu zer egin eremu horretan, hain zuzen yoga haurtzarora, nerabezarora, nahiz haurren esparruan lan egiten duten profesionaletara hurbilduz. Yogak, haur bati bere gaitasun guztiei eusteko ahalmena ematen dio eta are gehiago, garatu eta indartzeko. Beraz, mundu aztoratu honi aurre egiteko tresnak ematen dizkio.

Urteen zehar yoga munduan jasotako esperientziak esaten digu, Yoga Integralak pertsona eta haurraren ongizatea bermatzen duten hainbat teknika eskaintzen dituela, emozioen kudeaketa hobeago bat ahalbidetzen duela eta ondorioz barruan gordeta dugun bakean bizitzera eramaten gaituela. Gainera ez dugu ahaztu behar txikitan barneratutakoak, betirako balio duela.

Entzuna da dagoeneko, jolas garaia ondoren egindako arnasketa ariketa batek zenbat laguntzen duen haurrak lasai, sosegatuak eta kontzentratuak egon daitezen. Honek ordea ez dio bakarrik haur eta nerabeari laguntzen, baita bere lana ahalik eta ondoen egiten saiatzen ari den irakasle edo profesional horri ere. Eta are gehiago, bere ingurunea edo familiari ere hedatzen zaio.

Geroz eta irakasle eta hezitzaile gehiago daude, orain arte jaso izan dituzten tresnak, gaur egungo egoerara egokitzeko nahikoak ez direla sentitu eta yogara jotzen dutenak. Batzuetan maila pertsonalean eta bestetan profesionalean. Delakoa dela, argi dago zerbait egiteko aukera dugula eta saiatze horretan egindakoa nabaritzen hasia dela. Irakasle, hezitzaile edo haurrekin lanean dabilen edonor, denek laguntza behar dute eta Yoga Integrala laguntza hori ematera prestatzen da.

Hezkuntza berri bat nahi duen mundu berri baten ateak zabaltzear daude, haur eta nerabeekin harremantzeko eskainiko digun modu berri batekin. Mundu berri bat non bakoitzaren beharrei erantzunez, gelditu eta gure barrua entzun, sentitu eta bizitzeko aukera emango digun mundua.  Helduak izanik, ardura gure esku dago.

Lierni Garciarekin hitz egin dugu idatzi hau oinarri hartuta.

Lierni Garcia

Kaixo lagunak! Nire egunerokotasunaren oinarria den altxor preziatu bat konpartitzera nator zuekin. Noski, bakarrik baliogarria bazaizu hartu eta bestela utzi. Zuk duzu azken hitza. Dena den batzuetan gure barrutik sortzen dena ere entzuten ez dakigu, ez digute erakutsi edo ezin izan digute erakutsi. Beraz nola eman horrela azken hitza? Nire kasuan, Yogak laguntzen dit bilaketa horretan. Horrela hasi nintzen ni ere, nire barruan gertatzen ari zena entzuten ez nekiela konturatu nintzenean. Beti izan dut jakin min handia eta egin izan ditudan lanak ikasitakoak ezagutzera ematen oinarritu da. Lehen gida eta hezitzaile lanak egiten nituen, euskal kulturaren esparruan, baina estresak jota sentitu nintzen argi eta garbi nire bizitzako momentu batean eta yoga egiten hasi nintzen. Nafarroako Mahashakti Yoga Integral Eskolan ikasi nuen eta yoga irakaslea eta formatzailea naiz orain, dantza terapia Bartzelonan ere egin nuen eta masaje eta elikadura terapietan sartzen hasi nintzen ere. Helduei nahiz haurrei yoga integraleko klaseak ematen dizkiet, bakoitzari egokituak. Haurrei yoga ematea erronka berezia da eta oso aberasgarria maila guztietan. Iparraldeko eskoletan yoga saioak eman ohi ditut klase orduetan eta bidea hortik izan behar duela uste dugu, hezkuntza berri batengan eta yogak egiten duen mesedeetan sinisten dugunok. Tresna guzti hauek lehen adinetik ikasten baditugu, etorkizun hobeago bat eraikitzeko aukera dugula konbentzituta nago eta horregatik Mahashakti Yoga Integral Eskolak duen proiektuarekin bat egin eta aurrera goaz. Yoga haur eta nerabeei helarazi nahi diegu, gaur egun bizi dugun egoerak garrasika eskatzen baitu. Beraz proiektu hau Yoga haurrei helarazi nahi dion guztiari irekia dago, irakasle, hezitzaile, guraso sentsibilizatu….baina hortik haratago joan nahi dugu, instituzioetara bideratu eta Yoga eskoletan integratzea lortu nahi genuke. Zer dira bada, egun osoan zehar 10 minutuko barruko eten bat haurren egunerokotasunean. Gutxi da hori, gaur egungo gizarte honetan haurrei dispertsiora eramaten dien hainbesteko estimuluei aurre egin ahal izateko.

One thought on “Yogaren onurak haurtzaroan

  1. Pingback: GURASOAK 13. alea, Emoki, optometristak eta Yoga – Arrosa

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading