Quantcast
Guraso.eus

‘Txikipedia’ aurkeztu dute, haurrentzako ‘Wikipedia’

Euskal Wikilarien Kultur Elkarteak (EWKE), 2016an euskarazko Wikipedia sustatzeko sortutako taldeak, haur eta gaztetxoei zuzendutako eduki askeko euskarazko entziklopedia sortu du: Txikipedia. Atzo, eguena, Huheziren Eskoriatzako campusean aurkeztu zuten dagoeneko martxan dagoen proiektua.

'Txikipedia' aurkeztu dute, haurrentzako 'Wikipedia'

‘Txikipedia’ aurkezten, atzo Eskoriatzan.

 

Wikipedia aise ezaguna da, dagoeneko 300 hizkuntzatan eskaintzen du bere zerbitzua, tartean euskaraz, 2001az geroztik. EWKEk emandako datuen arabera, Euskarazko Wikipediak 291.000 artikulu baino gehiago ditu, munduko 31. hizkuntza da eta euskarazko webgunerik bisitatuena da egun, 70.000 bisita baino gehiagorekin egunero.

Entziklopedia askea publiko helduari dago zuzenduta, eta Txikipedia webgune berriarekin 8-12 urteko ikasleei bereziki moldatutako edukiak eman nahi zaizkie. 1.000 artikulurekin abiatu dute proiektua. “Gaiak modu sinple eta ulergarriagoan azaltzeaz gain, bitxikeriak, jakingaiak eta argibideak ematea da helburua”, azaldu dute elkartetik.

Proiektu berritzailea

Orain dela urte batzuk Vikidia izeneko proiektua jaio zen Frantzian, ostean beste hainbat proiektu eta garatu dira munduan, adibidez, Klexikon edo Wikijunior. Euskaraz ere egin zuten Vikidiaren bertsio bat, eta orain, Euskal Wikilarien Kultur Elkartearen ekimenez, Vikidian zegoen material guztia jaso eta Wikipedian proiektu berri gisa txertatu dugu, Txikipedia izenarekin: “Lehen Wikipedia gara horrelako ekimen bat martxan jartzen, eta nazioarteko hainbat wikilariren laguntza teknikoa jaso dugu horrelako apustua aurrera eraman ahal izateko”.

Wikipedia bezala, Txikipedia ere nahi duen orok osatu dezake. Horregatik aurkeztu zen atzo proiektua Huhezin, ikasleei eta irakasleei Txikipedia aurkeztu eta proiektu honekin bat egitera animatzeko.

One thought on “‘Txikipedia’ aurkeztu dute, haurrentzako ‘Wikipedia’

  1. Pingback: Txikipedia: haurrentzako euskarazko entziklopedia txiki eta askea – Guraso.eus

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading