Quantcast
Guraso.eus

Plana familian: Baxauri eta Obekuri herrien artean zabaltzen diren pagadiak eta ameztiak

Barrualdeko turismoa eta ornitologia bultzatzeko asmoarekin, orain dela lauzpabost urte ibilbide ornitologiko bat egokitu zuten Arabako bi herriren artean.

Errekastoak eta pago altuek zainduta ibili ahalko gara Baxauriko basoan, eta ameztiak lagunduta Obekuri aldean. Inguruok, gainera, hainbat hegaztiren babesgunea dira; okil handiak, okil ertainak, gabiraiak, edo aztore arruntak ikusi eta entzuteko parada izango dugu, isilka ibiliz gero.

Okil ertaina da, hain zuzen, Baxauriko eta Obekuriko basoetako eta ondoan dagoen Izkiko natur parkeko izarretako bat. Iberiar Penintsulako okil ertainen populazioaren %30 eremu horietan bizi baita. Halaber, Obekuriko presak eta Baxauriko Ramuza urmaelak hainbat hegazti erakartzen dituzte uda partean, eta patxadaz hartzen badugu, ahateren bat agertuko da, seskadien artean.
Halaber, ibilbide horren zati batekin bat egiten duen txango zirkularra dago; berdin irten daiteke Obekuritik edo Baxauritik. Obekuritik abiatuz gero, argibide taula bat aurkituko dugu, asfaltoaren ondoan, xehetasunak eskuratzeko oso aproposa. Teileria bideari jarraituko diogu, Obekuriko presara hurbilduko gara, eta ameztien baso ederra zeharkatuko dugu.
Baxauritik, berriz, frontoiaren alboan igaroko gara herritik ateratzeko, eta Ramuzako urmaelaren bideari heltzeko. Baltsaren eskuinetik doan bideari jarraituko diogu, eta berehala Ramuzako pagadiak bete-betean hartuko gaitu. Pago altuek eta errekatxoaren soinuak inguratuta ibiliko gara kilometro eta erdi inguru, harrizko zubi bat ikusi arte. Errotaranako ibarrean gora hasiko gara orduan.
Iturria: alea.eus

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading