Quantcast
Guraso.eus

Musika formazioak ‘ikasten’ erakusten du eta eragin positibo asko ditu nerabezaroan ere

Adostasun zabala dago; musika formazioak gaitasun intelektual ugari ematen ditu. Ikerketa ugari egin dira gaiaren inguruan, eta AEBko ikertzaile talde batek egindako beste behaketa batek antzerako ondorioetara eraman ditu ikerlariak.

Illinois-eko Northwestern Unibertsitatean egin dute ikerketa eta Zientzien Akademia Nazionaleko aldizkarian —PNAS— argitaratu dute. Ikerlariek Chicago inguruko DBHko bigarren mailako 40 ikasle behatu dituzte. Ikasleen erdiak musika banda baterako eman zuten izena eta beste erdiak ariketa fisikoan oinarritutako formazio militar kutsuko saioetarako.

Hiru urteko epean behatu dituzte ikasleak, eta amaieran berriz neurtu dituzte ikerketarako aukeratutako baloreak. Ikasle guztiek hobetu dituzte lengoaiarekin zein irakurketarekin lotutako gaitasun garrantzitsuenak, baina musika formazioa jaso dutenek hobekuntza handiagoa atera dute, esaterako, soinuaren xehetasunak antzematen eta garunaren sentikortasunean.

Ondorio nagusiak

Musika formazioak gaitasun kritikoa hobetzen laguntzen duela ondorioztatu dute zientzialariek. Gaineratu dute gaitasun linguistikoak areagotu eta entzute gaitasuna zorrozten laguntzen dituela. Garunak, bestalde, hobeto erantzuten du soinuaren aurrean, eta  zientzialariek diotenez “ikasten” erakusten du.

“Askotan musika ikasketak dira aurrekontu arazoak daudenean lehenengo kentzen direnak. Emaitza hauek erakusten dute musika ikasketek bere lekua izan behar dutela batxilergoko curriculumean ere”, adierazi du ikertzaile taldeko Nina Krausek.


 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading