Quantcast
Guraso.eus

Montse Velasco: “Sexualitatearekin lotuta, sarri gertatzen da gurasoek jasotakoa automatikoki transmititzea seme-alabei”

Gero eta leku gehiagotan egiten dira seme-alaben heziketa afektibo-sexualean laguntzeko gurasoentzako sexualitate saioak. Arrasateko Udaleko Sexologia Zerbitzuko hezitzaile Montse Velascok hainbat gidatu ditu. Eskaintza berria dute maiatzerako eta horrelakoetan zer nolako lanketa egiten duten azaldu du.

 

Maiatzean gurasoei zuzenduta egiten dituzten saioen izenburua da: Sexualitatea askea eraikitzen heziketa kontziente batetik. “Gai honekin askotan gertatzen dena da guk —gurasook— jaso duguna eta jasotzeko izan dugun era automatikoki errepikatzen ditugula, eta sarri ez gara kontziente izaten errepikatze horretan transmititzen ditugula gure beldur eta mamu guztiak”, adierazi du Velascok.

Velascok dio txikiak izanda ere —2-6 urte— neska-mutikoek badutela sexualitatea. Landu beharreko gaia da.

6-12 urte bitarteko seme-alaben gurasoekin egiten dituzten —eta egingo duten saioan— umeen gorputzetan ematen diren aldaketak lantzen dituzte. “Estereotipo asko iristen zaizkigu eta garrantzitsua da adin horretako seme-alabei azaltzea gorputza maitatu egin behar dela; izan ere, askotan gazte hauek deseroso sentitzen dira beraien gorputzarekin eta daukaten bakarra da. Garrantzitsua izan daiteke gurasoen parte-hartzea gai horretan”.

13-18 urte bitarteko seme-alabak dituzten gurasoekin desira erotikoa nola adierazi daitekeen lantzen dute. “Helburua da gurasoek beraien sexualitateari buruz hausnarketa egitea. Kontziente izan behar dugu nola bizi dugun gure sexualitatea; zein beldur eta zein irrika ditugun. Garrantzitsua da seme-alabei egingo diegun transmisio horretarako”, adierazi du Velascok.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading