Quantcast
Guraso.eus

Martxoak 8ko greban umeak partaide

 

-Ama, zer da emakume greba?

-Emakumeok, bakoitzak ahal duen neurrian, egunerokotasunean egiten ditugun lanak egingo ez ditugun eguna.

-Zergatik egingo duzue greba?

-Mundu osoan, baita Euskal Herrian ere, emakumeok lan anitz egiten dugu eta horiek guztiak ez dira behar bezala baloratzen, ezta elkarbanatzen ere.

-Ze lan mota dira horiek?

-Etxetik kanpo egiten dugu lan emakume askok eta horren truke soldata jasotzen dugu hilero. Soldata hori gizonezkoena baino baxuagoa da maiz, emakume izateak balio gutxiago balu. Etxe barruan hamaika lan mota ezberdin egiten ditugu, hala nola, erosketak, garbiketak, sukaldatu, ordena mantendu, zuei ikastolarako gauzak prestatzen lagundu, senitartekoak zaindu, zuetako bat haserre edo triste dagoenean emozioak kudeatzen lagundu, zuen zaintzarako beharrekoa koordinatu, konponketak …Eta gizarte mailan lanean dihardugu ere. Zuen eskolaz kanpoko ekintza taldeetan, ikastetxean, mugimendu kultural, ekologista, feminista, kirolean… Emakumeok inplikazio handia dugu gure gizartea hobetzeko baliagarriak diren eremuetan lanean.

-Ama, zuen lan hauek guztiak oso garrantzitsuak direla uste dut, baina ez dituztela baloratzen esan didazu lehen. Zergatik?

-Gizonezkoek egindako lanak izan dira beti balio handikoak kontsideratuak, beraiek baitziren etxetik kanpo lan egiten zutenak eta horren truke dirua lortzen zutenak. Emakumezkoek etxe barruko lan guzti horiek egitean ez zuten dirurik lortzen eta tamalez dirua da gauzen garrantzia neurtzeko irizpide bakarra maiz. Mendetan zehar gizonek eraiki dute lan mundua, legeak, arauak eta hauetatik eratorritako eskubideak ere. Horren ondorioz bi mailako jendartea sortu zen, gizonezkoak lehenetsiz eta emakumezkoak bigarren mailan utziz. Horrek emakumezkoen eskubide eta erabaki hartzea zaildu egin du eta urtetan zehar emakumeok egindako aldarrikapen feministei esker gure egoeran hobekuntzak ematea lortzen ari gara eta etorkizun libre eta justoa lortuko dugu. Bestetik gero eta gizon gehiago dira egoera honetaz ohartarazi ditugunak eta gure aldarrikapenekin bat egiten dutenak.

-Baina gizon helduak honetaz ohartu badira, zergatik lan hauetako askok zuek egiten dituzue oraindik?

-Gizonek abantail asko dituzte gaur egun eta gure aldarrikapenekin bat egiteaz gain, abantail horiek gurekin elkarbanatzeko prest egon beharko dira. Eginbeharrak eta eskubideak berdinduz, abantailak partekatuko genituzke ere. Gizon askori pausu hori ematea falta zaie.

-Eta martxoak 8an hori eskatuko diezue?

-Martxoak 8an emakumezkook egiten ditugun lan guztiak kalera aterako ditugu, egiten ditugun gauzen balioa agerian jarriko dugu eta emakume guztiok ahalduntzean pausu berria emango dugu. Emakumeak geldituko bagina, mundua geldituko litzateke. Munduaren ardura gure gain dugu eta hori aldatu beharra dago. Gizonei berauen pribilegioak uztea, emakumeen ondoan eta atzean egoten ikastea eta egunerokotasuneko eginbeharrak partekatzea eskatuko diegu.

-Ama, zer lortuko genuke martxoak 8ko helburuak beteko balira?

-Emakume eta gizon librez osatutako herria. Guretzat bizitza duina eta zuentzako etorkizun hobea. Jendarte justua finean.

-Ama, martxoak 8an zuk greba egin ahal izateko nik egingo ditut etxeko eginbehar batzuk eta gaur bertan hasiko naiz entrenatzen beti zurekin lana elkarlanean egiten ikasteko. Feminista naiz?

-Feminista izaten ikasten ari zara, segi horrela maitia!

Maider Garcia de Vicuña

Maider García de Vicuña naiz, ikasketaz Psikologo eta Sexologoa. 2002tik Sexologiaaren esparruan lan egiten dut, tarteka bestelako lanak egin ditudalarik. Hainbat Maider ditut barnean, sexologoa, bi semeen ama, irakurzale, bidaiari, musikari…eta beste hamaika, unean uneko gogo eta baldintzen arabera azalarazten direnak. Bizitza erdia hezitzaile lanetan eman dut, Hezkuntza ez-formalean gaztetan eta Sexuen Hezkuntzan eta honekin bat datorren guztia (izate sexuduna, sexu-identitatea, sexualitatea osotasunean, aniztasunaren aberastasuna, sexuen arteko eskubide berdintasuna…) lantzeko saioak egiten helduaroan, haur eta gazteekin, baita eragile eta gurasoekin ere, honetarako aukerak urriagoak badira ere. Hezitzaile eta hezia naiz aldi berean, dakidana eman eta egunero besteek ematen didatena jasoz. Hala ulertzen dut bizitza, ikas prozesu amaigabe bezala, zeinean egunero, edonork eta edonon zerbait erakutsiko didan. Amatasuna duela 8 urte hasitako ikas prozesu konzientea da, nahigabe ordea, jaio bezain pronto hasi nuena, neska izateak suposatzen zuena ikastearekin batera ama izateko ereduak ere barneratu nituelako. Eta hala nola nabil hainbeste urtetan ikasitakoak ahantziz eta emakume, ama, lagun, bikote, feminista, langile,…izateko bide propioak bilatuz. “Ni” pertsonala, bakarra, berezia, askea eta asea eraikiz. Txikitandik idazteko grina izan dut eta proiektu interesgarri honetan nire aportazio xumea egingo dut hitzez baliatuz, nire hausnaketa pertsonalek zuentzako, beste gurasoentzako, baliagarriak izango direlaren itxaropenaz. Nire hitzetatik bakar bat poltsikoan sartuko bazenute, pozik!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading