Quantcast
Guraso.eus

Maitasun erromantikoaren iruditerian sare sozialak oso rol garrantzitsua jokatzen ari dira

Maitasun erromantikoaren ideiak, kontrol jokabideak eta neska-mutil gazteen artean ideia horiek
barneratzearen ondorioz gertatzen diren indarkeria-agerpenak saihesteko, elkarlanean dihardute
Gipuzkoako Medicus Mundik, Farapi kooperatibak, EHUk eta Peruko Manuela Ramos mugimenduak.

 

 

 

 

 

 

 

Sare sozialetan eta Interneten, orokorrean, nerabeek izaten dituzten ohiturak eta harremanak aztertu dituzte, elkarlanean, Gipuzkoako Medicus Mundik, Farapi kooperatibak, EHUk eta Peruko Manuela Ramos mugimenduak. Proiektuaren izena Gazteak eta maitasun erromantikoa: onlineko ohiturak, balioak eta sinesmenak da, hain zuzen ere.

Ikerketa bat egin ostean, nerabeek maitasun erromantikoaren gainean dituzten ideiak, kontrol jokabideak eta neska-mutilek ideia horiek barneratzearen ondorioz gertatzen diren indarkeria agerpenak lantzea eta tresna didaktiko bat baliozkotzea da elkarteen helburu nagusia. Horretarako, Gipuzkoako hainbat tokitan saioak egiten ari dira, nerabeekin, helduekin eta hezkuntzako profesionalekin.

Ikerlana Gipuzkoan egiteaz gain, Peruko hiru zonatan ere gauzatu dute hango Manuela Ramos elkartearekin batera –Lima, Ayacucho eta Ucayali–. Euskal Herriko eta Peruko kasuetan, 13 eta 18 urte arteko gazteek parte hartu dute, baita helduek ere –adin horietako seme-alabak dituzten gurasoak eta hezkuntza arloko hainbat profesional–. “Ikerketaren lehen emaitzek argi utzi dute beharrezkoa dela sortutako tresna gazteei nahiz helduei zuzenduta egotea”, aipatu dute ikerlana egin duten elkarteek.

“Gipuzkoan ikerketa bat gauzatu dugu, eta maitasun erromantikoaren iruditerian sare sozialak oso rol garrantzitsua jokatzen ari direla ikusi dugu. Hortik sortzen diren arazoak eta gatazkak konpontzen saiatzeko erreminta bat sortzea da gure helburua. Orain lantzen ari garen atala Peruko Manuela Ramos elkartearekin lankidetzan garatzen ari gara. Eta eurek ere Gipuzkoan egiten ari garen batzarretan parte hartu dute, elkarlanean aurrera egiteko. Bizipenak elkarbanatzea eta elkarrengandik ikastea da helburua”, azaldu dute Farapi kooperatibako kideek.

“Maitasun erromantikoaren ideia nerabeen identitatean nola eraikitzen doan aztertzeaz gain, Peruko eta Gipuzkoako ikerketaren kasuan, arrazoi nagusi moduan elementu komun ugari zeudela ikusi dugu, indarkeria matxistaren eraikitzean, maitasun erromantikoaren gaineko ideiei dagokienez, bikoteen arteko kontrola… Aurrera begira planteatu behar ditugun estrategiak, beraz, ikerketaren emaitzek eman dizkigute, hein handi batean. Teknologia berrien bidez nerabeengan biolentzia hori nola eraikitzen doan ikusi dugu, eta herrialde bakoitzak horri nola egin diezaiokeen aurre hausnartu dugu”, azaldu dute Manuela Ramos mugimenduko ordezkariek.

Ondorioetatik, erreminta didaktikoa

Sare sozialek eta teknologia berriek duten pisua eta horiek ekar ditzaketen arazoak duela bi urte egindako ikerketa baten ondorioetan atzeman zituzten lau elkarteek. Izan ere, teknologia berriak oso garrantzitsuak dira nerabeen eta gazteen artean, batez ere.

Ikerketaren emaitzen arabera, 13-15 urteko nerabeak artatzea oso garrantzitsua da, eta, batez ere, neskak. Horrela, elkarlanean erreminta didaktikoa sortzen ari dira, nerabeak eta gurasoak kontzientziatzeko helburuarekin.

Gipuzkoan bilerak egin dituzte helduekin eta gazteekin, eta gero, materiala berriro testatu dute hezkuntza arloko profesionalekin, “emaitza hautemangarriagoak” lortzeko. “Hezkuntzako profesionalendako beste erreminta bat behar genuela konturatu ginen orduan. Eurak izango dira zubia, eta erreminta didaktikoa erabiliko dutenak. Edonork ezin ditu indarkeria matxista,
cyberbullying-a edota horrelako kontzeptuak hala nola landu, eta hori eskatu digute profesionalek; oinarri teoriko garrantzitsua behar dutela, hain zuzen ere. Zentro ezberdinetako errealitateei egokitzea ahalbideratuko du horrek, gainera”, nabarmendu dute Farapiko kideek.

Gema Hierro (Medicus Mundi Gipuzkoa): “Arazoa mundu mailakoa dela ikusarazi nahi dugu”

Elga Prado (Manuela Ramos mugimenduko kidea): “Honen aurrean hezkuntza da tresna eraginkorrena”

Ines Dinant (Farapi kooperatibako kidea): “Helburua sare sozialetako indarkeria aztertzea da”

Iturria: Puntua aldizkaria

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading