Quantcast

Lizarrako Plisti-Plasta egitasmoa

 

Zer da Plisti-Plasta? Nortzuk eta zertarako sortu duzue?
Plisti-Plasta familiagunea eta jolasgunea eskaintzak dira.
Itsaso San Martin eta Txusma Azkona gara eskaintza hau luzatu dugun profesionalak.
Badira guraso asko haurtzaindegiak eskaintzen duen zerbitzuaz harago behar dutela beste zerbait: beraien esperientziak konpartitu, profesionalen laguntza izan, haurrarekiko eta bere gaitasunekiko begirada enfokatu…


Argitu beharra dago profesionalen laguntza esaten dugunean, horixe dela. Ez da gehiago jakitea, edo nola egin behar den erakustea. Alderantziz. Profesional hauen lana gurasoak ahalduntzea da. Beraiek duten berezko sena berreskuratzea, eta modu honetan, zalantzak eta kezkak konpartituz horiei aurre egitea.

Jolasguneak aldiz, libreki jolasteko gunea litzateke, non material naturalen eta ez estrukturatuen bidez haurren adimena eta sormena sustatzen diren. Jolasgunean, gurasoen partaidetza eta presentzia ezinbestekoa da. Haur eta gurasoen artean adostuko da zein den harrera denbora, hau denboran nahi adina luzatu daitekeelarik.

 

Esku-hartze eta gune ezberdinak proposatzen dituzue, zeintzuk dira?
Plisti-Plasta gunean badira hainbat eskaintza:
Familia guneak, bitan banatzen direnak: haur txikienekin (bere kabuz desplazatzen diren arte), eta haur koxkorrekin (bere kabuz desplazatzen direnetik, bi-hiru urtera arte).
Familia guneetan, astero ordu eta erdiz aritzen gara hainbat gai eta kezka argitzen saiatzen, haurraren gaitasunak behatzen ditugun bitartean. Gune hauetan, hezkuntzarako familia bakoitzak duen sen propioa sustatu, eta bide batez, ahalduntzea dugu helburu.
Haurren behaketa horretarako, arreta non ipini lagunduko dugu, horretarako modu positiboan egin ahal dutena balioztatuko baitugu, eta ez horrenbeste egiten ez dakitena.
Jolas guneak ere bitan banatzen dira: goizeko eta arratsaldekoa. Bakoitzean eskaintza desberdina da, espazio aldetik, gurasoen rolaren aldetik, etab…
Goizeko jolas gunean, kanpo espazioa gehiago lehenetsiko dugu.

Kanpo espazioari garrantzia ematen diozue? Zergatik?
Zalantzarik gabe. Kanpoak ematen dituen aukerak izugarri zabalak eta osasungarriak dira.
Txatxilipurdik itzuli eta argitaraturiko Heike Freireren “Berdean hezi” liburuan datu asko azaltzen dizkigu jolasaren inguruan, eta bereziki, jolasa aire librearen inguruan.

Azken urte hauetan aire librean ematen den denbora izugarri murriztu da. Ondorioz, kanpoan ematen den jolasaren denbora ere murriztu da. Lehen, “jolasa” hitza aipatzean, kanpoko jolasa zetorkigun gure irudimenera; aldiz orain, “jolasa” esan, eta orokorrean, leku zarratuetan eta batez ere aparatu elektronikoekin irudikatzen dugu. Aldi berean, hainbat ikerketen arabera, gaitz “moderno” desberdinei aurre egiteko kanpoan aritzearen onurak nabariak dira. Argi dugu kanpoak duen garrantzia, eta ahal den neurrian horixe bultzatu eta sustatuko dugu gure gune eta eskaintzan.

Nola ulertzen duzue jolasa?
Nola ulertu daiteke ba? Jolasa bizitza da. Tonuccik esaten duen legez, “jolasa, bakarrik arriskatzea esan nahi du, bakarrik aukeratzea, edonorekin elkartu edozer egiteko. Eta esperientzia hau desagertzen ari da. Haurrak jolasa beharra dauka ez hiltzeko. Airea bizitzeko lez.  Haur eta adituek eskola barru eta kanpotik eskubide hau aldarrikatzen dute. Eskubide hau, hainbat teoriek azaltzen dute biologikoki osasuntsu, emozionalki lasai, ongizatearekin, besteekin hobe erlazionatzeko balio duena, gatazkak modu resiliente batean konpontzeko edota bizitza alaitasunez maitatzeko modu bat bezala”. Modu honetan ulertzen dugu ba jolasa, eta gure guneak horixe sustatu nahiko luke.

Lizarran kokatzen da egitasmoa. Hau da zuen eragin esparrua?
Lizarra eta Lizarraldea bai. Inguru honetan uste dugu eragina izan ahal dugula. Halere, familia guneetan asteroko saioak direnez, posible litzateke urrunagotik heltzea.

Aldi berean, egitasmoa ez da Lizarran geratu daiteken egitasmoa. Beharra orokorra eta zabala da. Ondorioz, beste hainbat herritan ere sustatu daitezke halako egitasmoak, eta, esperientzia hauek partekatuz, gizarteari eta familiei zerbitzu hobeagoa eskaini ahalko diegu.

 

DISFRUTANDO-GOZATZEN

DISFRUTANDO-GOZATZEN

تم نشره بواسطة ‏‎Plisti Plasta Espacio familiar- Familia gunea‎‏ في 3 مايو، 2017

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading