Quantcast
Guraso.eus

Letica Garcés: “Zer erakutsi erabakitzen dugun moduan, noiz eta nola ere gehiago pentsatu beharko genuke”

Nafarroako Unibertsitateko pedagogoa da Letica Garcés eta atxikimendutik heztearen garrantziaz egiten du berba. “Atxikimendutik hezi daiteke baina baita ere haserretik, beldurretik, tristurarik… Haur bat hezten duzunean zuk sentitzen duzun guztiak du eragina berarengan”.

Emozioen heziketan lan egiten duen Padres Formados erakundeak antolatutako hitzaldietan hartzen du parte sarri eta ohartarazten du seme-alabak ikaragarri maite baditugu ere posible dela atxikimendutik ez heztea, une jakin batzuetan. “Guraso edo hezitzaile moduan gure helburua da umea maitatua sentitzea beti. Garrantzitsua da, batez ere, 0-6 urteko etapan. Zer gertatzen da? Batzuetan haserretu egiten garela edo garrasi egiten diegula, esaterako, edalontzi bat bota dutelako. Edalontziak eragindako kaltearengatik haserretzen gara, benetan? Ez. Gaueko 20:00ak edo 21:00ak dira eta egun osoan pilatutakoa daramagu guk ere gure motxilan. Halakoetan eztanda egiten dugu eta hori seme-alabak asko maite baditugu ere. Une horretan ez gara atxikimendutik hezten”.

Zer, nola eta noiz

Atxikimendutik hezteko hiru faktore hartu behar direla kontuan ohartarazten du Garcés-ek: zer, nola eta noiz. “Zer da erakutsi nahi dudana, noiz eta nola. Haur batek, bereziki 0-6 etapan, mugak, arauak… ikasi behar ditu. Noiz eta nola da hemen gakoa”.

Adituaren esanetan askotan ez dugu unea ondo aukeratzen. “Umeak zerbait oker egiten duenean eta horrek asaldatu gaituenean orduan baliatzen dugu aukera hezteko, eta ez da unerik onena”, azaltzen du. “Hezi beharrean ohi egiten diogu”.

Helduok egoera horiek identifikatzen ikasi behar dugula uste du Garcés-ek. “Lanketa bat egin behar dugu. Batzuetan egokiagoa da beste une baterako uztea eta lasaiago gaudenean gaia berriz ateratzea”.

Heziketa errepikapenetan oinarritzen dela dio adituak. “Errepikapen etengabean eta konstantean, modu lasaian eginda eta helduaren presentziarekin eta laguntasunarekin. Haur bati agindu bat ematen diogunean erreakzio naturala frustrazioa da. Emozio hori ulertu egin behar dugu eta kudeatzen ikasteko erremintak eman behar dizkiogu umeari. Horrek, noski, esfortzu bat suposatzen du helduarentzako. Pentsatu behar dugu zein den gure helburua: irakastea jostailuak jasotzeko ohitura edo gure aginduak betetzeko direla. Horren arabera, umeari gure laguntza eskainiko diogu frustrazio hori kudeatzeko edo aginduko diogu jaso ezean zigor bat izango duela”.

Hezteko moduak, sarri, helduak bere emozioak kudeatzeko duen gaitasunarekin lotuta zuzena duela uste du Garcés-ek. “Eta ondo aukeratu behar da umea hezteko unea”.

Argazkiaren iturria eta informazio gehiago: padresformados.es  (gazteleraz)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading