Quantcast
Guraso.eus

Kike Amonarriz: “Izan zaitez erreferente eta egin ezazu euskaraz inongo konplexurik gabe”

Lehen urtetik zortzi urte bitartera arteko epean finkatzen omen dira hizkuntza ezagutza, erabilera-ohiturak eta hizkuntzarekiko jarrerak, batez ere. Hori dela eta, adin horrek hizkuntzaren ikasketan eta familia transmisioan duen garrantzia aintzat harturik, Debagoieneko Mankomunitateak eta udalek gurasoengana zuzentzea erabaki dute. Hala, Biharko euskara gaur liburuxkaren 4.600 ale banatu dituzte eskualdeko bederatzi herrietan.

Liburuxka hori duela hamar urte sortu zuen Kike Amonarriz soziologoak, eta, egokitzapen
batzuk egin ostean, berriro argitaratu dute. “Aholkuak, azken batean, berberak dira; aldatu
ditugunak gizarte faktoreak dira: genero ikuspegia eta sare sozialen aipamena, esaterako”.

Denei zuzendua

8 urtez azpiko haurrak dituzten guraso euskaldun, erdaldun eta mistoei dago zuzendua liburuxka, baina egileak guraso erdaldunak nabarmendu ditu, batez ere. Gaineratu du euskara ere etxeko hizkuntza izaten saiatzeko, haurrak hizkuntzarekiko motibatzeko, guztia eskolaren gain ez uzteko eta halako aholkuak datozela bertan. “Izan zaitez zure haurraren ikasle eta aprobetxatu zure haurrarekin gehiago egoteko eta denbora horretan berarekin euskara ikasteko”, dio soziolinguista tolosarrak.

Gurasoetako bat euskalduna eta bestea erdalduna den kasuetarako ere badaude aholkuak
liburuxkan; horietan aipagarriena, euskaraz haurrari soilik ez hitz egitearena; horrela bada, haurrak euskara umeen hizkuntza moduan identifika dezakeelako.

Amaitzeko, guraso euskaldunen kasuan, aholku nagusi bat eman du Amonarrizek: “Izan zaitez
erreferente eta egin ezazu euskaraz inongo konplexurik gabe”.

Gida euskaraz hemen.

Gida gazteleraz hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading