Quantcast
Guraso.eus

Jose Miguel Barandiaran marrazki bizidun bilakatuta

Bere izena daraman Fundazioak 1,2,3… Barandiaran egitasmoa garatu du. Bost bideo laburrez osatuta dago eta antropologo ezagunaren bizitzako hainbat pasarte kontatzen dira bertan.

Jose Miguel de Barandiaran Fundazioak HEZIMUBIrekin batera garatu du 1,2,3… Barandiaran egitasmoa.  “Azaroaren 5ean aurkezpena eginda, asmoa hilean behin gure Youtubeko kanalean eta webean bideo berri bat sareratzea izango da”, zehaztu dute Fundaziotik.

Marrazki bizidun forman datorkigu Barandiaran oraingoan. Gaztaroan hasita –antropologia eta etnografiarako bere zaletasuna azaleratu zenean— erbestera arteko kontakizuna egiten da ekoiztutako bideoetan zehar.

Fundazioak argi dauka: modu erakargarri eta freskoan Euskal Herrian zein atzerrian erreferente izan zen gipuzkoarraren irudia gaur egunera ekartzea funtsezkoa da haren izena eta izana mantentzeko. “HEZIMUBItik lan ederra egin dute, Barandiaranen bizitzako hainbat momentu modu erraz batean ezagutzeko aukera ematen dute bideo hauek. Proiekturako propio sortutako irudi zein musikak eta Jon Aizpurua kazetariaren lokuzioak harrapatu egiten du ikuslea hasieratik”.

2019an bigarren zatia

Bideo hauek, baina, ez dute Barandiaranen bizitza osoa hartzen. “Ezinezkoa da bost bideo laburtxotan ia 102 urte bizi izan zituen gizonaren bizitza laburbiltzea. Luzeaz gainera, oparoa izan zelako mundu mailan ezagun den ataundarra”. Hala, Jose Miguel de Barandiaran Fundazioa hasi da dagoeneko lanean eta 2019ko bigarren seihilekorako guztia aurkezteko prest izatea espero du.

Informazio gehiagorako: gasteiz@barandiaranfundazioa.eus edo www.barandiaranfundazioa.eus

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading