Quantcast

Ipuin klasikoak eta harremanak

 

Azken bi asteetan ipuin klasiko bi izan ditut esku artean. Ez dakit klasikoak diren edo ez baina niri ume nintzenean kontatu zidaten eta sasoi hartako gehientsuenoi. Lehengoa Marizikin. Kontatu ama, kontatu… Bueno… zer egingo dut? ez naiz oso ondo gogoratzen zer kontatzen zuen baina banekien ez zela nire gustukoa. Halere gustatzen ez zaizkidan mezuak lantzeko erabiliko dut… Hasi orduko damutu nintzen. Nola eman buelta ipuinak kontatzen duen mamiari? nondik heldu ere ez nuen jakin.

Hurrengo ipuina kontsulta baten esperoan geundenean. Edurne Zuri eta zazpi ipotxak. Enee… sentsazio bera.

Pentsakor jarri naute bi ipuin hauek. Jakin banekien sexistak zirela. Baina ipuin kontalari bati entzun nion ipuin tradizionalak aldatzea berarentzat akats bat zela. Ipuin bertsuak errepikatzen baitira gizaldi eta kultura ezberdinetan. Eta mende, gerra, gizaldiak … pasa badituzte zerbaitegatik dela. Barnean daramaten mezua uste baino indartsuago delako alegia. Ipuinaren arkeotipoak daramana oso boteretsua omen da gizakiontzat. Ideia hori present nuela saiatu nintzen ipuina kontatzen baina ez nuen lortu.

Honen inguruan nire semearekin hitz egin nahi dut. Eta zera kontatu nahi diot; ez zaizkidala bi ipuin hauek gustatu. Zergatik ama?  Hemen agertzen diren harremanak ez ditut gogoko. Emakumeen arteko konfrotasioa, lehiakortasuna dute ardatz. Ez dira aliatuak, ez dute elkar laguntzen. Etsaiak dira biak ala bietan. Edertasunagatik lehiatzen dute. Edertasuna da emakumeetan garrantzitsuena eta horren arabera gorrotatzen edo goraipatzen dituzte. Edertasunarekin zer lortzen duten…

Gero umetatik entzuten dugu neskok sorginak garela. Mutilak baino sorginagoak. Intentzio okerrak ditugula harremanetan. Ideia hori belaunaldiz-belaunaldi pasatu da. Eta ez dut uste zuzena denik. Emakume gure artean ez gara etsai.Gure artean aliatzen gara. Zaindu egiten gara. Ez dugu printze batengatik lehiatu nahi. Ez dugu beste bati begira bizi nahi. Gure ametsak bete nahi ditugu.
Ipuin hauetako pertsonen arteko harremanak oso arriskutsuak iruditzen zaizkit. Harreman mota hauek tratu txarren oinarri dira. Beraz, klasiko izango badira ere, nik ezin izan dut dauden horretan trasfondoa azaldu gabe kontatu. Baliteke ipuin hauek klasikoak ez izatea eta honek nire buru hausteak erraztuko lituzke.

Larraitz Arando

Aupa! Larraitz naiz. Aspalditik konturatu nintzen pertson arteko harremanek eta bertan sortzen diren energiak liluratzen nauela. Kuriositate horri tiraka… ikasketa (Psikologia, terapia mundua, sexologia, psikopedagogia, haur eta nerabeen terapia) eta bizipen asko bilatu ditu bizitzako ibilbidean zehar. Azkenean nire pasio hauek nire ogibide bilakatu ditut.

One thought on “Ipuin klasikoak eta harremanak

  1. Dorleta Kortazar Alkoz

    Larraitz, zoaz jatorrizko bertsiora!!!!! bertsio konkretu batez ari zara, eta horiek ez dute zer ikusirik jatorrizkoek duten mezuarekin. Zoritxarrez, guztiz zabalduak eta ofizialtzat jotzen ditugu garai baten industria konkretu batek hedatu zituen bertsioak eta pena da.

    Ederra da txikiekin harremanen edo bestelako gaien inguruan aritzea ipuinak ardatz hartuta, baina seguru berbaldia beste bide batetik joango dela.

    Zaindu!!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading