Quantcast
Guraso.eus

Haur eta gazte literatura. Proposamena. Elmer

Fitxa teknikoa

 

Izenburua: Elmer

Idazlea: David McKee

Argitaletxea: Alberdania-Erein-Igela

Argitalpen data: 2012

Itzultzailea: Aiora Jaka

Ilustratzailea: David McKee

Bilduma: Klis-klasikoak

Orri kopurua: 40 orrialde

Laburpena

 

Elmer elefantea ortzadarra bezain koloretsua da. Hori dela eta, bere taldeko elefanteek barre egiten diote. Besteek bezala elefante-koloreko azala balu, inork ez lioke barrerik egingo, eta horrek hobeto sentiaraziko luke Elmer, ezta? Ondorioek beste zerbait erakusten dute, ordea.

David McKee idazle eta ilustratzailearen ipuin dibertigarri hau banakotasunaren eta barraren aldeko aldarrikapen sutsua da.

Kritika

 

Hona hemen Xabier Etxaniz Erlek 2013. urtean garan argitaratutako kritika.

Klis-klasikoak bilduman haur literaturako oinarrizko liburutegia osatu nahi dute Galtzagorri elkartekoek, eta oinarrizko liburutegi hori, edo haur literaturako kanon bat edo «klasikoak» batu nahi dituen bilduma horretako azken ekarpena “Elmer” obra dugu. 1989an argitaratu zenetik Elmer elefantea herrialde ezberdinetan ibili da, lagun ugari egin ditu, liburu izatetik jostailu, puzzle, panpina izatera ere pasatu da; baina, batez ere, egungo haur literaturako klasikoa dugu Elmer. Azalean bertan ikus daiteke nolakoa den Elmer, koadro koloredun elefantea; hots, surrealista, ezberdina, bitxia, aparta… eta horrelakoa da, hain zuzen, Elmer. McKeek elefanteen izaera eta kolore grisaren aurrean bestelakoa aurkezten digu, eta irudietan bertan tonua ere horrelakoa da; lehen irudian elefante taldea ageri da: «Baziren elefante gazteak, elefante zaharrak, elefante handiak eta txikiak, gizenak eta argalak. Desberdinak izan arren, oso zoriontsuak ziren, kolore berekoak ia denak». Eta «ia» hori azaltzeko hurrengo orrian paisaia berdea eta elefanteen griseta urdinxka koloreen ordez Elmer agertuko zaigu, koloretako elefantea, zuhaitzei, hostoei, hegaztiei, bere inguruan dauden guztiei kolore bizitasun hori emanez. Baina Elmerrek alaitasuna banatzen du dagoen lekuan, bera dagoelarik taldea pozik da, Asun Agirianok liburuaren hitzaurrean dioen bezala «Elmer elefanteak izaera jostalaria du. Irriak sortzen ditu inguruan (…) bizipoza aldean daramanak alaitasuna zabaltzen du inguruan. Elmerrek ez ditu desberdintasunak ulertuko; bai, ordea, lagunak eta bera estu-estu lotzen dituen barrearen hari fina», hari fin hori liburuan zehar nabarituko dugu, presente egongo da, eta liburu honetan hasitako bidea Elmer elefantearen beste ugaritan ere badago, gu irria ezpainetan Aiora Jakarena bezalako beste itzulpen batzuen zain geratzen garelarik.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading