Quantcast

Galtzagorri elkartearen ‘Liburuen Altxorra’ eskolaz eskola

Irakurzaletasuna bultzatzeko ekimena da Galtzagorri elkartea-ren Liburuen Altxorra eta urteak daramatza martxan. “Txikiak diren ikastetxeetan liburutegiak ondo hornitzeko zailtasun handia izaten dute. Liburuen Altxorra ekimenarekin egoera hori apur bat leuntzea bilatzen dugu. Galtzagorri elkarteak liburuz betetako kutxa bat eramaten du ikastetxeetara, eta gutxienez lau aste ematen ditu bertan. Ikasleek liburu horiek irakurtzeko eta etxera eramateko aukera izaten dute, eta oso ondo funtzionatzen du ekimenak”, azaldu du elkarteko kide Imanol Mercerok.

Azaldu du Gipuzkoako zein Bizkaiko Foru Aldundiek babestutako ekimena dela honakoa eta Galtzagorri elkartean liburuz betetako hamar kutxa dituztela; bost Gipuzkoarako eta bost Bizkairako. Kutxa bakoitzak 120 bat liburu ditu.

“Ikasleei kutxa erakusten diet eta aurkezten dizkiet liburuak. Horrekin batera dinamika zein den azaltzen diet”, azaldu du. Kutxan ekarritako liburuak sailkatu egiten dituzte adin egokitasunaren arabera eta ziklo edo talde bakoitzak bere sorta jasotzen du.

Mailegua eta haurrentzako dinamizazio saioak

Liburu kutxak ez dira eskola txikietara bakarrik heltzen. Galtzagorriko dinamizatzaile batek gidatzen ditu, eta ikasleen adinaren araberako dinamizazio saioak eskaintzen ditu eskola bakoitzean. Liburuak aurkeztu, kontakizun txikiak egin, poesia jokoak burutu, album ilustratuak ikusi…

Kutxa hilabetez eskolan izan ondoren dinamizatzailea eskolara itzultzen da kutxaren bila eta haurrekin hilabete horretan egindako irakurketak partekatzera. Gainera, beste kontakizun edo irakurketa batzuk eskaintzen dizkie. Ondoren, kutxak bere ibilbideari ekiten dio eta beste herri batera joaten da, beste eskola batera, beste ikasle batzuek altxorraz goza dezaten.
 
Irakasleentzako aholkularitza zerbitzua

“Azken urteetan, errealitate zeharo desberdinak topatu ditugu bisitatu ditugun ikastetxeetan, eta gure egitasmoa errealitate horri egokitzeko asmoz aholkularitza zerbitzu ibiltaria bideratzen dugu. Irakasleen formazioa, eskola liburutegien dinamizazioa eta liburuak baloratzeko irizpideak sustatzea dira zerbitzu honen helburu nagusiak”, adierazi du Galtzagorritik.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading