Quantcast
Guraso.eus

“Ez ni hainbeste maitatu, maitatu nazazu hobeto”

Carmen Ruiz Repullok indarkeria matxistarekin lotutako tailerrak egiten ditu nerabeekin institutuetan. Beste batzuen artean maitasun erromantikoaren ideiaren inguruan aritzen da gazteekin, eta baita ere haien hezitzaileekin.

 

 

 

 

 

 

 

Tailerrak iragartzerakoan Ruiz Repullok ez du indarkeria matxista aipatzen. “Genero indarkeria aipatzen duzunean atzera egiten dute gazteek esanez horrelakorik ez dela ematen beraien inguruan, baina datuek kontrakoa diote”, adierazten du adituak. “Bestelako izenburuak ipintzen ditut, esaterako Ez ni hainbeste maitatu, maitatu nazazu hobeto; izan ere, horrelakoak motibagarriagoak dira”, dio.

Eta horrela da. Nerabeek uste dute beste adin batekoen artean ematen direla indarkeria matxista kasuak, baina datuak kezkagarriak dira nerabeen artean ere.

• Forenseen arabera %30 hazi da sustantzia kimikoak kontsumitu ostean egindako bortxaketa kasuak. Burundanga datorkigu burura, baina alkohola ere neskak sexualki erasotzeko sustantzia bihurtu da.
• Hamar nerabetik bederatzik aitortzen dute bikotekidearekiko indarkeria psikologikoa eragin izana.

“Institutu batean sartzen naizenean hezitzaileek esaten didate bertan ez dagoela indarkeria matxista kasurik, eta bi orduko saioan aztertzeko moduko hiru kasu lokalizatzen ditut nik”, dio Ruiz Repullok. “Ez gaude gero eta okerrago. Gertatzen dena da gizarte matxista batean bizi garela oraindik ere, eta oinarrizkoa da parekidetasunean eta parekidetasunerako heztea”.

Gaia gehiago sozializatu behar dela uste du adituak. “Gizarte honetan uste dugu erasotzailea profil berezi batekoa dela, klase sozial berezi batekoa eta familia mota batekoa. Eta nik diot hori ez dela horrela. Beldur handiagoa ematen dit diskurtso onargarria duen mutil neomatxista batek betiko mutil matxista batek baino”.

Ikerketa kualitatibo bat egin du Ruiz Repullok, eta erasotuak izan diren neskak zein erasotzaileak izan diren mutilak elkarrizketatu ditu. Neskek adierazten dute indarkeria matxistaren arrazoiak hiru direla: matxismoa, matxismo hegemonikoa eta diskurtso erromantikoa. “Txuloak erotizatu egin ditugu. Heziketa desberdina ematen diegu neskei eta mutilei, eta horrelakoak bultzatzen ari gara”, dio. “Berdintasunean oinarritutako maskulinitate batean hezi behar ditugu gazteak. Semea parekidetasunean hezteko ez da nahiko aita batek esatea jaso mahaikoak eta garbitu komuna. Lehenengo aitak egin behar du”.

Maitasun erromantikoaren ideiak ere kalte handiak egiten dituela uste du adituak. “Ipuinak kontatzen dizkigute non printze salbatzaileak agertzen diren. Jeloskor egotea ez da maitasun adierazle, ez dago laranja erdirik, maitatzea ez da sufritzea eta maitasuna ez da guztiaren konponbidea”. Horiek guztiak azaldu egin behar zaizkie nerabeei Ruiz Repulloren ustez.

“Jakin behar dute indarkeria matxista ez dela soilik eraso fisikoa dagoenean ematen. Lagunak kontrolatzea, telefono mugikorrean jasotzen dituzten mezuak kontrolatzen hastea, zaletasunak kontrolatzea… horrelakoekin hasten da dena. Gero etortzen dira sare sozialen kontrola, janzteko modua kontrolatzea, izateko modua kontrolatzea, aisialdi espazioak mugatzea, familiarengandik banatu nahi izatea eta baita ere harreman sexualetan kontrola hartu nahi izatea”.

Albistearen eta argazkiaren irudia hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading