Quantcast
Guraso.eus

Etiketak irakurtzen

 

Jostailu bat erostera goazen aldiro eskuartean dugun jostailuaren bilgarriak informazio pila bat eskaintzen digu etiketa desberdinen bitartez. Baina, ba al dakigu etiketa horiek zer esan nahi duten? Etiketa horiekin gai izango ote gara gure beharrei eta testuinguruari erantzungo dion jostailua aukeratzen?

Jarraian, jostailuen bilgarrien etiketen esanahia azaltzen saiatuko naiz alde batetik eta bestetik, jostailu baten bilgarriak izan behar duen gutxieneko informazioa zein den. Ea ba, jantzi ditzagun antiojuak eta findu dezagun bista.

 

Etiketa bat, esanahi bat…

Sarri eskuartean dugun jostailuaren bilgarrian ez dugu arreta jartzen baina, begirada pixka bat findu ezkero informazio dezente jaso genezake. Zer adierazten dute beraz, jostailuen bilgarrietako irudi hauek?

CE

Ikur honek adierazten digu eskuartean dugun jostailu horrek Europar Batasunak ezarritako gutxieneko segurtasun neurriak betetzen dituela.

Jostailu motaren arabera gutxieneko segurtasun baldintza horiek aldatu egin daitezke. Eta jostailuak arriskuren bat suposatzen badu haurrarentzat, hitz hauekin adierazia agertu beharko litzateke: “OHARTARAZPENA” edo gazteleraz (zoritxarrez ohikoena dena)  ADVERTENCIAS.

 

 

0-3

Horrelako piktograma agertzen bada jostailuaren bilgarrian, esan nahi du jostailu hau ez dela gomendagarria 36 hilabete arteko haurrarentzat. Seguruenik pieza txikiak izan ditzake, edota adin tarte horretako haurrak kolpatu ezkero hautsi egin daiteke eta barruko materialen bat isuri… hipotesi desberdinak egin daitezke hemen.

 

FSC

Baso Kudeaketaren Kontseiluak (Forest Stewardship Council) eskaintzen duen ziurtagiria da honako hau. Erakunde honek basoen ustiapen jasangarria sustatzen du eta ziurtagiri hau daramaten egurrezko jostailuek zera adierazten dute: jostailu horiek egiteko darabilten egurra lortzeko basoen ustiapen jasangarria bermatzen dutela. Beraien praktikarik ohikoena hauxe izan ohi da: ebakitako zuhaitz bakoitzarengatik, berri bat landatzea.

 

BIO

Ikur honen inguruan luze jardun genezake, jostailugintzaz gaindi, bestelako sektoreetan duen presentzia ere areagotu baita: jantzigintza edo elikagaiak besteak beste. Jostailuen alorrean bi produktu motak izan ohi dute Bio etiketa: batetik ehunezko jostailuak (panpinak, kuxinak etab.) eta bestetik material berriekin egindako jostailuek. Ehunezko jostailuen kasuan, ohikoena da kotoi organikoz egindako jostailu edo panpinen etiketan Bio izendapena azaltzea. Material berriez egindako jostailuen kasuan denetik aurkitu genezake; kasu honetan azukre kanaberaren hondarrarekin eta erretxinarekin egindako eraikuntzarako blokeen jostailu etiketa bat duzue irudian. Hemen baina, gero eta material berri gehiago sortzen ari dira beraz, ez da arraroa izango etiketa hau gero eta gehiago ikustea. Etiketa honen aurrean zalantzarik izan ezkero, onena, dendariari galdetzea.

 

 

 

BPA, PVC… FREE

Etiketa hau ere gero eta ohikoagoa bihurtzen ari da plastikoz edota silikonaz egindako material edo jostailuetan. Baina zer adierazten dute tankera honetako etiketek? Bada, BPA (Bisfenol A) plastikoen fabrikazioan ohikoa den konposatu kimikoa da. Eta oso presente egon ohi da plater, botila, txupete eta jostailuetan besteak beste. Kasu honetan, jostailu horren eraikuntza prozesuan konposatu hori baztertu dutela adierazten du etiketa horrek. PVC-aren kasuan ere antzera eta baita latexa edo plastikoen fabrikaziorako erabiltzen diren beste konposatu kimikoen kasuan ere. Gero eta praktika ohikoagoa da horrelako konposatuak bazter uztea plastikoz egindako jostailuetan. Badira ere, plastiko birziklatuaz egindako jostailuak.

 

 

 

DERMATOLOGIKOKI FROGATUA

Azalean eragin bat duten jostailuetan (margoak, tatuajeak…) ohikoa da horrelako etiketaren bat agertzea. Etiketa honek baina, derrigorrean erakunderen baten izen eta datuak behar ditu. Hau da, etiketak garbi adierazi behar du, froga dermatologiko hori NORK burutu duen eta erakunde edo zentro horren informazioa ere adierazi behar du.

 

 

Eskaini beharreko gutxieneko informazioa:

 

Ikusten duzuen moduan etiketa eta sinbolo ugari aurkitu ditzakegu jostailuen bilgarrietan, garrantzitsuena baina berauek identifikatzen jakitea da. Horretaz gain, kontutan izan jostailu batek honako gutxieneko informazio hau eskaini behar duela derrigorrean.

 

-Jostailuaren izena: sortzaile edo fabrikatzailearen izena etab.

-Gutxieneko adina: jostailuaren erabilerarako gutxieneko adin gomendagarria zein den.

-Argibideak: eragilera arau edo gomendioak.

-Hizkuntza: Edozein eduki behar bezala etiketatua egon behar da informazio guztia tokian tokiko hizkuntza ofizial batean gutxienez argitaratu behar da. Kasu honetan, euskara beti… azken putz!

-Funtzionamendu elektrikoa: korronte elektrikoa behar badu, potentzia, tentsioa, kontsumoa, ze pila mota etab. behar dituen adierazi beharko du.

-Garrantzitsua da informazio guztia argia eta errez irakurtzeko modukoa izatea bilgarrian edota jostailuak aparte dakarren eskuorrian. Emandako informazioak ezin du zalantzarik sortu.

 

 

 

 

 

 

 

 

 

 

Mahai jolasen kasuan bilgarrian honako informazio hau ikusten duzuenean jakin ezazue zera adierazten duela: erabilerarako adin gomendagarria, jolaskide kopurua eta jolasaren gutxi gora-beherako iraupena.

 

Dagoeneko baduzue nahikoa informazio etiketa saltsa ulertzeko… Orain zuen begirada findu eta aukeraketan asmatzea dagokizue. Zorte on eta gozatu jolaserako aukeraketarekin!

 

 

Itsaso Pagoaga

Kaixo denoi, Haur Hezkuntzako ikasketak egin izanagatik ez naiz irakasle. Aspalditik gehiago interesatu zait hezkuntza ez formaleko esparrua (eskolaz kanpokoa), hezkuntza formala baino. Jolasarekin erlazionatutako gaiak interesatzen zaizkit: jolasak, jostailuak, eskulanak, jolaserako espazioak, jolas ohiturak etab. Jolasteaz gain margotzea, musika ikus-entzutea, zinema eta literatura ere gustuko ditut. Ingurukoek diotenaren arabera, berba zalea eta umoretsua naiz. Guraso.com-eko leiho honetan ere jolasaren inguruan nire hausnarketa, ideia eta proposamenak zuekin partekatzen saiatuko naiz. Eta nola ez, noizean behin jolaserako gonbidapena ere luzatuko dut. Izan ere, ez al dago jolasean ondo pasatzea baino gauza atseginagorik? Itsaso Pagoaga Zaloña (Arrasate, 1985)

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading