Quantcast
Guraso.eus

Eskola Kirola Elkartea sortu dute Oñatin, aitzindaria Gipuzkoan

Orain arteko eskola kirolaren gaineko azterketak ondorioztu du aldaketak beharrezkoak direla, eta aldaketa horiek irailetik aurrera nabarituko ditu erabiltzaileak; esaterako, astean zeharreko saioek eta asteburukoek lotura zuzena izango dute. Herriko hiru ikastetxeek osatzen dute elkartea eta Udalak diruz laguntzen du.

 

 

 

 

 

 

 

 

 

Elkartea irailean hasi zen lanean, ikasturtearekin batera. Egungo eskola kirolaren jardunean aldaketak sartzen hasi dira eta datorren ikasturtean nabarituko dira aldaketa horiek. “Orain arte Eskola Kirolean astean zehar egiten ziren ekintzek ez zuten loturarik asteburuan egiten zirenekin. Irailetik aurrera, biek harremana izango dute. Hau da, astean zehar entrenamendu saio bat egingo da, asteburuko partiduari begira”, azaldu du Eskola Kirola Elkarteko komunikazio arduradun Aitor Guridik. “Seguru asko, matrikulazio kopurua jaitsi egingo du horrek, baina kalitatean asko irabaziko da”, gehitu du.

Gainera, kirol berriak txertatzen ere joango dira, pixkanaka, eta entrenatzailearen figura ere aldatu egingo da. “Orain arte, gurasoek egiten zuten lan hori, eta datorren urtetik aurrera formalizatu egingo da hori ere”.

Gipuzkoan aitzindari

Gipuzkoan aitzindari izango den egitasmoa da Oñatiko Eskola Kirola Elkartea. Urteetan egon da eskola kirola herrian, kiroldegitik koordinatua, eta hori instituzionalizatu egin da orain, elkarte izaera hartuz.

Herriko hiru ikastetxeek osatzen dute elkartea Udalaren babesarekin: Txantxiku Ikastolako errektore kontseiluak, kooperatiba moduan; Elkar Heziko fundazioak; eta Urgaineko guraso elkarteak. “Orain, kontu korronte bakarra dago, adibidez, eta elkartetik zuzenduko da egitasmoa”, azaldu du Kirol zinegotziak, Borja Moiuak.

Ikastetxe bakoitzak bere funtzioa da. “Txandaka egingo dute. Orain, Urgainekoek zuzendaritza izango dute, Elkar Hezikoek diru kontuak eramango dituzte eta komunikazioa, berriz, Txantxiku Ikastolakoek. Hiruzpalau urterako lanak izango dira, eta gero, berriz txandakatuko dituzte”, adierazi du Moiuak.

Hitzarmen batek lotzen ditu Udala eta Eskola Kirola Elkartea. Hitzarmen horrek jasotzen du, besteak beste, Udalak elkarteari diru laguntza emango diola eta udal instalazioak erabiltzeko aukera izango dutela.

 

Eskola Kirolean datorren ikasturtera begira egingo diren berrikuntzak kudeatzeko eta hemendik aurrerakoak antolatzeko, langile bat kontratatuko du laster Udalak. Jardunaren %50 bideratuko du Eskola Kirolera eta gainontzekoa udal kirol teknikariari laguntzera.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading