Sozio-konstruktibismoan oinarritutako eredu pedagogikoa dute Antzuolako Herri Eskolaren. Hiru hamarkadako ibilbidea dute eta asko izan eredu pedagogikoaren nondik norakoak eta emaitzak bertatik bertara ezagutzera gerturatu diren adituak eta arituak.

Mondragon Unibertsitateko irakasle Xabier Arregi oñatiarrak, esaterako, esperientzia horren inguruko doktore tesia egin berri du. Sozio-konstruktibismoa zer den eta zertan oinarritzen den azaltzeko hainbat ezaugarri nabarmendu ditu.

. Antzuola eskola esperientzia bat da 30 urtean eraiki dena eta eraikitzen jarraitzen duena. Irakasle taldea joan da poliki poliki eta komunitate osoaren laguntzarekin gaur egun Antzuola bezala ezagutzen den hezkuntza proiektua eraikitzen.

. Eskolak inguruan duen testuinguruaren eta dituen haurren eta ikasleen arabera joan da hezkuntza proiektua eraikitzen. “Ahalmen hori izan beharko lukete eskolek”, esan du Arregik.
“Gauzak ez datoz goitik behera baizik eta tokian tokiko baldintzen arabera joan beharko genuke ikusmoldeak eta praktikak eraikitzen”.

. Lotzen dute ikaste-prozesua haurren garapen prozesuarekin eta ikasleen ezaugarrietara eta ongizatera begira dago eginda antolaketa. Ikaste-prozesuak etengabe antolatzen doaz. Hori lan handia da; izan ere, oso zaila da aurrez jakitea zer etorriko den.

. Eredu horri eusteko konpromiso handia dago komunitate osoaren aldetik. Irakasleen konpromisoa, esaterako, oso handia da.

Ikertzaile askoren interesa

Mondragon Unibertsitatearekin batera badaude Antzuolako eredu pedagogikoa ezagutzeko interesa duten ikertzaile gehiago. Esate baterako EHUko talde bat sozio-konstruktibismoak Antzuolako gizartean duen eragina aztertzen ari da. Bi proiektu nagusi dituzte: testuliburu moduko bat egin gura dute erretiroa hartuta dauden irakasle batzuekin eta ikerketa bat egiten ari dira hezkuntza proiektuaren inguruan egon daitezkeen zalantzak uxatzeko. Antzuolako eskolatik irteten diren ikasleek zein prestakuntza maila dute? Zein da beraien profila?

“Horrelako esperientzietatik asko dago ikasteko eta erakundeen aldetik ez dago babes eraginkorrik”, esan du Xabier Arregik.