Quantcast
Guraso.eus

Barbara Oakley: “Uste dugu kontzentratuta gaudenean bakarrik ikasten dugula, baina ez da horrela”

Barbara Oakley hezitzaileak ikasketa prozesuekin lotuta neurozientziak egindako aurkikuntza berri baten inguru azalpenak ematen ditu. “Jende askok ez daki, baina gure garunak bi sare oso ezberdin ditu. Oso kontzentratuta gaudenean bat erabiltzen dugu eta bestea pentsamendua bideratzen ez dugunetan erabiltzen dugu. Esaterako, dutxan gaudenean, paseo bat ematen ari garenean…”.

Adituak dio zerbait ikasten ari garenean sarri egiten dugula salto sare batetik bestera. “Jendeak uste du kontzentratuta gaudenean bakarrik ikasten dugula, baina ez da horrela. Lasaitzen garenean edo kontzentrazio prozesu horretan atseden hartzen dugunean ere gure garunak lanean jarraitzen du, bigarren plano batean bada ere. Horregatik gertatzen zaigu batzuetan ikasten ari ginen horretara itzuli eta bat batean gauzak hobeto ulertzen ditugula”.

Ondo ikasteko aholkuak

Bi aholku nagusi ematen ditu Barbara Oakley hezitzaileak ondo ikasteko.

– “Ez da ezer gertatzen gairen batera lehenengo aldiz gerturatzen garenean ez badugu barneratzea lortzen. Ez da ezer gertatzen. Berez, hori da ohikoena. Egia da garun batzuk lasterketako autoak direla eta beste batzuk paseatzaileagoak. Lehenengoen kasuan berehala barneratzen dituzte gauzak. Bigarrengoen kasuan tartekatu behar izaten dira kontzentrazio uneak  atseden uneekin. Akaso denbora gehiago behar dute bigarrengoek, baina modu sakonagoan barneratzen dute jakintza”, azaltzen du Oakley-k.

– Pomodoro teknika gomendatzen du adituak. “Ikusten ari gara ikasle askoren arazoa dela ez dutela ikasteko duten hori une jakin horretan ikasteko gogorik. Orain badakigu zerbait egiteko gogorik ez dugunean gure garunean atal bat aktibatzen dela minarekin zer ikusia duena. Hala, zer egiten du? Ba beste zerbaitetan jartzen duela arreta eta orduan min hori desagertu egiten da. Baina, noski, atzeratu egiten dugu ikasketa prozesua”.

Pomodoro teknika Francesco Cirillo italiarrak asmatu zuen 80ko hamarkadan. Sinple dela dio Oakley-k. “Distrakzio guztiak saihestu behar dira eta 25 minutuko epeak ipini. Ez deirik, ez notifikaziorik, ez musikarik, ez ordenagailurik… eta denbora tarte horretan ahalik eta gehien kontzentratzen saiatuko gara. Seguruenik gure garunak arreta galduko du, baina ez gara larrituko eta saiatuko gara ahalik eta lasterren kontzentrazio egoera batera itzultzen. 25 minutuko tarte hori pasa denean sari bat aitortuko diogu gure buruari: gustuko kantu bat entzungo dugu, kafe bat hartuko dugu, ikas-mahaitik altxatu eta pauso batzuk emango ditugu, bideojokoren bat egingo dugu… Baina denbora batera itzuli egingo gara beste 25 minutuko kontzentrazio tarte bat egitera. Itzultzea zaila egiten bazaizu kronometro bat ipiniko dugu atseden tarte hori ere neurtzeko”.

Oakley-k dio emaitza onak ematen dituela Pomodoro teknikak, eta normala dela garunak tarteka kontzentrazio maila galtzea.

Argazkiaren iturria hemen.

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading