Quantcast
Guraso.eus

Adostasun gero eta zabalagoa baratzearen balio pedagogikoaren inguruan

Gaiaren inguruko jardunaldia egin berri dute EHUko Uda Ikastaroetan, eta hizlari guztiek nabarmendu dute baratzearen balio pedagogikoa. Hain zuzen ere, gero eta gehiago dira baratzea duten ikastetxeak eta jarduerak berak aukera ematen die curriculumean garrantzitsuak diren bestelako gaiak sartzeko: elikadura ereduak, janaria ekoizteko sistemak, jasangarritasuna, maila txikiko nekazaritza…

Baratzea lantzeak erakusten die neska-mutikoei ingurunea ezagutzen eta landareak zaintzen, pazientzia edukitzen, ardurak hartzen… Gainera, elikadura ohitura osasuntsuak bultatzen ditu eta horrekin batera talde lana eta inplikazioa. Jarduera fisikoa bultzatzen du, eta jakin-mina zein interes zientifikoa eragiten ditu. Ortua ekologikoa bada ingurumenarekiko errespetua ere lantzen da eta neska-mutikoak birziklatzeko prozesuetan hasten dira…

Ezbeharrei aurre egiten ere ikasten dute; izan ere, haizea, euria edo kazkabarra dela baratzean ezusteei aurre egin behar zaie.

EAT proiektua eskolaz eskola

2017-2018 ikasturtean Kutxa Ekoguneak eta Euskal Fondoak bat egin dute EAThink: bertokoa jan, mundua buruan egitasmoarekin. Euskal Herriko ia 100 eskoletan ibili dira Lehen eta Bigarren Hezkuntzako ikasleei aurkezpenak egiten. “Tokikoak, ekologikoak eta garaikoak diren produktuak ekoizteak eta kontsumitzeak gure eta mundu mailako nekazaritza ereduetan duen eragina barneratzeko aukera ematen digu proiektuak”, adierazi dute.

Eskola-baratzeen ingurukon online ikastaroak, ekintzak, ikas-unitateak eta material didaktikoa… eskaintzen dituzte. Informazio gehiagorako sakatu hemen.

Argazkiaren iturria Kutxa Ekogunea

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading