Quantcast
Guraso.eus

Nerabeak nagusiei mugikorrak erabiltzen erakusten aritu dira

Eskoriatzan Almen-Arizmendi ikastolako DBHko 3 eta 4. mailetako ikasleek telefono mugikorrak erabiltzen erakusketa hiru saio eman dituzte Olazar erretiratuen elkarteko kideekin. Parte hartzaileak zein antolatzaileak pozik agertu dira ekimenak emandakoarekin.


“Esperientzia polita izan da denak irteten direlako irabazten”, adierazi du Eskoriatzako bibliotekari eta ekimenaren bultzatzaile Iñaki Agirianok. “Nagusiek zalantzak argitzeko aukera izan dute eta gazteek azalpenak modu argian emateko ahalegina egin dute. Adin desberdinetako pertsonak elkartu ditugu. Erretiratuek ez dute erreminta moderno hauek erabiltzeko jakituriarik baina esperientzia handia dute bizitzan. Gazteek alderantziz eta talde biak elkartzea eta harremanetan jartzea oso positiboa da”.

Hiru saioko ikastaroa izan da eta ikasleek aurretik prestatu dute edukia; izan ere, batzuetan ez da hain samurra izaten dugun ezagutza hori azalpen argiekin transmititzea.

Bideoak grabatzen, aplikazioak jaisten, iratzargailua jartzen… erakutsi diete nagusiei. “Egin dizkiguten galderak erantzun ditugu. Etxeko lanak ere bidali dizkiegu eta egin dituzte. Joan dira zituzten zalantzak ekartzen eta ondo ibili gara”, adierazi du nerabeetako batek.

“Zaila egiten zaigu mundu hau, baina horrela erakutsita eta pazientziaz hartuta zerbait ikasten da. Ikasten jarraitu beharko dugu eta praktikatzen”, esan du erretiratu batek. “Oso pozgarria da gazteek borondatea erakustea guri gauza hauek azaltzeko. Orain dena makinatxoa da eta ikasi egin beharko dugu”.

 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading