Quantcast
Guraso.eus

50€ KO billete faltsua

 

Bideo honetan Merlí filosofia irakasleak lezio bat eman nahi dio Joan izeneko ikasleari, 50€ko billete bat erabiltzen du horretarako. Erakusten dion aurreneko aldian billetea berri-berria dago, osorik, zimur edo matxurarik gabe. Bere balioaz ohartarazi ondoren, zapaltzen, estutzen joango da, billetea erabat zimurtuta eta ia-ia ezagutu ezinda geratu arte. “Zu billete hau bezalakoa zara, nahiz eta asko zapaldu edo mindu, berdin balio duzu”, izango da emango dion lezioa.
Erabili duen irakasteko modua oso oso ona da, baina zer gertatuko litzateke gu 50€ko billete horrekin beste modu batera identifikatuko bagina?

Nerabe zein heldu askok dituzten arazoen jatorria txiki-txikitatik landu beharko liratekeen oinarri emozionaletan dago. Oinarri emozional hauek ondo finkatzen ez badira autoestimu baxuko pertsonak ‘sortuko’ dira eta autoestimu baxua duen pertsona bat billete horretan identifikatua sentituko da, baina 50€ko billete faltsu bat dela pentsatuko du. 50€ko billete faltsu bezala sentitzen bagara, ez dugu lezio honen balioa ikusiko, eta ez hori bakarrik, gure barruan oraindik eta okerrago sentituko gara, guk bakarrik bait dakigu ez dugula hori balio, faltsutasun horretan, gure balioa hutsa bait da.

Bideo hori ikusi nuen aurreneko aldian ikaragarri gustatu zitzaidan. Mezua ederra da. Bigarren aldiz ikusi nuenean ordea, urte batzuk atzera egin nuen eta Joan-en lekuan eserita ikusi nuen nire burua. Garai hartan, nire etsairik handiena ni nintzen horretan, mezua nola jasoko nuen sentitu nahi izan nuen eta pentsatu nuena hori izan zen, ni ez nintzela benetako 50€ko billetea sentituko, billete faltsua, baliorik gabekoa nintzela uste nuen eta.

Baina noiztik?

Beti bezala, prebentzioa aldarrikatzera nator. Txiki-txikitatik indartu behar ditugu gure seme-alaben gaitasun emozionalak, haur erresilienteak, adimen emozional altua dutenak, enpatiadunak, frustrazioari tolerantzia dutenak eta gaitasun sozialak dituztenak izan behar dira, inoiz ez daitezen 50€ko billete faltsu sentitu.

Gure seme-alabentzako lezio asko izan ditzakegu, eredu asko erakutsi, baina oinarriak, zimentuak, lantzen ez baitugu, lezio guzti horiek ez dute ezertarako balioko.

Itxaro Mendizabal Amundarain

Itxaro Mendizabal Amundarain Ez naiz psikologoa, ez naiz psikiatra, ez naiz nutrizionista, ezta medikua ere. Elikadura nahasteak ezagutzen ditut; batez ere bat, eta bertatik hitz egingo dut. Nire esperientzia eta bizipenetatik atera ditudan ondorioak dira hemen idatziko ditudanak, ez dira egia absolutuak izango…. bai ordea nire egiak. Ama naiz, bi alaba ditut. Ikasketez Ingeniari Informatikoa, Marketin Digital eta SEOn aditua. Elikadura Pediatrikoan masterra ere badut, baina batez ere bizitzako bidaian ikasle naiz. Ttiklik izeneko ametsari forma emateak asko lagundu dit bide honetan.

3 thoughts on “50€ KO billete faltsua

  1. Pingback: GUASOAK haurren autoestimua, tratu txarren aurrea nola jokatu – Arrosa

  2. Pingback: 50€ KO billete faltsua – TTiKLiK!

  3. Pingback: IRUZURGILEAREN SINDROMEA – TTiKLiK!

Utzi erantzuna

Zure e-posta helbidea ez da argitaratuko. Beharrezko eremuak * markatuta daude

loading